جّوه حضن..امى
نفسى أسكن
جّوه حضن امى
و اعيّط بالسنين
نفسى أشكى
بس أشكى مين..لمين؟؟
نفسى أنجّى اللى باقى
من بواقى الحلم
ويّـــــــــا الغرقــانـيـن
كل حاجة..عايزة حاجة
تـلمها م البعترة
العِضام قـامـت بتـسأل
هّيه فين المــقـــــبـــرة؟؟
والسؤال الجاى سأل
يا هل ترى
دمعك التايه ف يوم
هـيلاقى عين؟؟
نفسى أسكن جّوه حضن امى
و اعيّط بالسنين
نفسى أمشى
والحياة مليون متاهة
ف الطريق
جّوه قلبى العمر صحرا
والجمل زى الغريق
والعطش ف الحلق خايف
و الزمن حالف
ما يوم يتبل ريق
و ان ف يوم حن و عطانى
بإيده كاس
أشربه...ملهوف يا ناس
ألتقيه مليان آسى...ُمر السنين
نفسى أسكن جّوه حضن امى
و اعيّط بالسنين
نفسى أعرف
هيّه إيه غلطة حياتى
وذنبى إيه؟؟
ليه تملى الحلم ضايع
مهما أدّور
مش لاقيه
ألف كلمة(لأ) ف عمرى
ليه مصاحبة ألف (ليه)
بحر ضلمة..فيه باعافر
والزمن.....بتر الإيدين
نفسى أسكن
جوه
حضن امى
واعيط بالسنين
.jpg)
2 قول رأيك:
السلام عليكم
شجن وتلقائية وكلام يمس كل وتر
وعن نفسي, نفسي أستخبى في حضن امي وأعيط مليون سنة , لكن رحمة الله وسعت كل شىء, ونحن شىء
متخليش شىء يهزمك ,ولا شىء يبتر إيديك, وخليك معافر
الأخت...مجداوية
وعليكم السلام ورحمة الله وبركاته
أشكرك للزيارة و التعليق
يسعدنى رأي حضرتك..ولو أن الحالة لا تتعدى خاطرة شعرية(هى لا تقرب أبدا للمكرونة الشعرية)هههههههههههه
الحمد لله أنا إنسان مسلم ومؤمن بقضاء الله عزو جل و قليلا جدا ما تنتابنى مثل هذه الحالات وإن إنتابتنى فأنا كتوووووووووم إلى أبعد الحدود لأننى لا أحب أن أضايق من حولى...
دمتى فى حفظ الله
إرسال تعليق