الجمعة، 15 أكتوبر 2010

ليه يا مصر ؟؟


ليه يا مصر بقيتى تِركه
تنكتب ضمن الميراث
ليه غرقنا ف وحل بِركه
و إحنا قالعين المداس
ليه باعوكى حته حته
ياللا باللا .. خلاص خلاص
خد رفح و ادينى طابا
بالتبادل .. راس ف راس
-
ليه يا مصر الخير ماليكى
و ليه ما ليكى اى خير
اوهب اللى ما ليا ليكى
و اللى ليا .. مش كتير
اصلهم خدوا كل حاجة
حتى عمدان السرير
حتى ارضى خدوها منى
بس خلونى .. الغفير
-
ليه يا مصر بقيتى جثه
فيها مش باينه الحياة
غدروا بيكى و ياما لسه
قولى مليون الف آه
اللصوص .. أسياد علينا
و الشريف جواكى تاه
و القوى بيستقوى أكتر
و الضعيف خد فوق قفاه
-
ليه يا مصر بقيتى عزبه
ملك افندينا الكبير
و إحنا فيكى بقينا حسبه
ع الورق ارقام كتير
و إن ف يوم الحق قلنا
نتفرد زى الفطير
و رصاص الصياد يصيدنا
قبل ما نفكر نطير
-
ليه يا مصر النومه طالت
قولى لعيونك تفوق
و اللا دى غيبوبه ماسكه
فيكى من ايام فاروق
اللى تحت .. تحت يفضل
و اللى فوق ح يتنه فوق
إنتوا راضعين تلج و اللا
دمكم ساب العروق
-
عشت فيكى العمر أشكى
ما حد سامع ليا شكوى
و اللى فوق الكرسى واخدك
طول حياته غسيل و مكوه
عارفة .. يوم ما ح يعدمونى
و قالوا إيه ف نفسك يا عِكوه
نفسى أكتب ف الوصيه
إن أنا ولادى .. تراكوه

9 قول رأيك:

maxbeta3zaman يقول...

يوم ماقابلتك يامحيى
يومها زاد تقديرى ليك
قبلها كان تسعه دايره
تمت الميه...... بإيديك
واما شوفتك لك معزه
وسط عملاءك ...وليك
برضه فى بلوجك صحابه
والصحابه ...تشتريك
فى العمل فطنه وموده
والموده... طبع فيك
شوفت فى القهوه الجماعه
بالموبايل بتناديك
لما ف الزنقه عبرنا
سلم الكل ....عليك
انت معروف للأكابر
والصغار برضه ينادوك
عمر فعل الخير مايبلى
كل ده لاحظته فيك
نص ساعه كات كفايه
ارسم الصوره واديك
شوف هنا كاتب قصيده
مين بكلماته ..يباريك
انت واحد ...بس واحد
فى السليم ..وده قلته ليك

كلمات من نور يقول...

والله الذنب مش ذنب مصر ذنب الكام وتمانين مليون اللي نايمين في عسل مسموم يا بني

تحياتي

واحد من البلد دى يقول...

الأخ الفاضل

الباشمهندس ماكس بتاع زمان

يعنى حضرتك قاصد تحرجنى و اللا إيه؟؟؟؟

والله لقدذبت خجلا من تعابير حضرتك الجميلة و المخجلة أيضا...مش قادر أوصف لحضرتك مدى سعادتى بمقابلة حضرتك...فأنت شخصية غاية فى الإحترام المفعم بالبساطة و التواضع ولا يملك من يتعرف إليك سوى أن ينجذب لحضرتك و كأنه يعرفك من سنين....أتمنى دوام التعارف وبلاش لسل بقى ...وحشتنا مواضيعك الجميلة

أخيك الصغير ...

واحد..للأسف...من البلد دى

ْْْْْْْْْْْْْْْْْْْْ~~~~~~~~~~~~~~~~~~~~~~~~~~

الأخت الفاضلة

كلمات من نور

أعتذر لتقصيرى مع حضرتك لكنى و الله يعلم مشغول دائما...فمسؤلياتى العائلية كثييييييييييييييرة..أشكر لحضرتك الزيارة الكريمة...

المشكلة أختنا الفاضلة ليست فى الشعب ولا الحاكم..ولكنها فى البطانة المحيطة به..

عافانا الله و اياكى وأدامكى سالمة غانمة لأولاد حضرتك....تلك الملائكة التى نستمد منها الصبر على ما نحن فيه من بلاء..

دمتى بكل خير

مدحت محمد يقول...

انا برضه مع كلمات من نور
الشعب هو اللى غرقان فى البطيخ

غير معرف يقول...

آخر جميلة حادة. ويعتقد أبدا أنه كان هذا سهلا. تحترم لكم!

غير معرف يقول...

وأخيرا ، حصلت على ما كنت أبحث عنه! أنا بالتأكيد تتمتع كل قليلا من ذلك. سعيد أنا تعثرت في هذه المادة! ابتسامة لقد قمت بحفظها للتحقق من الاشياء الجديدة التي ترسلها.

rovy يقول...

فينك أخى .. فينك يا أبن بلدى ..
طولت الغيبة و كسلان أكثر منى ..:)

*سمر* يقول...

محتاجين كلام حضرتك الحلو ده فى الفرحة اللى احنا عايشينها بالثورة
دمت بخير و فى انتظار العودة

غير معرف يقول...


عطشـــان ياصبايا دلونى على السبيل

فى عام 2008 كتبنا فى مصــــرنا محذرين ... من المؤسف أن صحفى مصرى مقيم فى أمريكا يكتب و يهتم و يحذر منذ أكثر من 6 سنوات بينما فى مصـــر نيام .. نيام -
عزيــــزى القارئ أرجو أن تتعب نفســـك و تقرأ :
- حوار مع السفير إبراهيم يســـرى
- حوار الفريق ســوار الذهب : أتمنى أن تزول الحدود بين مصــــر و الســـودان
- ثقافة الهزيمة .. السودان أرض مصرية
- ثقافة الهزيمة .. موسم الهجرة إلى الجنوب ...

بالرابط التالى


www.ouregypt.us