إنفد بجلدك
(رثاء للشهيد خالد سعيد)
إنفد بجلدك يا جدع
من دى البلد
هوه انت ما سمعتش حصل إيه للولد
إسمع يا سيدى..
و ان فيه حاجة غامضة يعنى!!
قوللى ...عيد
الجدع ده كان اسمه (خالد)
و الغريب ان اسمه كان
(خالد سعيد)
والسعادة منين تجيله.؟
وهوه ظلم ف ظلم مات
مش لوحده..
دا كل جيله
م اللى رفضوا السكاتات
قصره يعنى...
عم خالد زى كل شباب بلدنا
غاوى نِت
حب يعمل ع الحكومة
واد خلاصة و شاب فِت
قام نشر ع النِت فيديو
فيه حكاية من الحكاوى
قول يومين و الشاب سيرته
كات حديث كل القهاوى
بوكس قام م القسم دوغرى
ويّـــــــــا جوز المخبرين
ع الكافيه واخدين طريقهم
كانوا عارفين هوه فين
قول يدوب و ف كام دقيقة
كان خدوه بره الكافيه
قال(حسين)فين الحقيقة
إنتوا خدتوه بره ليه.؟؟
كان(عوض)ع الأرض ساحبه
ودم(خالد)ع القميص
سلّمه ل(محمود)يكّمّل
هيّه إيه؟؟...
زفة عريس...؟؟؟؟؟
كسّروا سنانه الجميلة
و وشه ف الباب الحديد
والجيران مالهمش حيلة
شيئ مكرر...إيه الجديد!!!
كان بيصرخ....إرحمونى
ثانية هدنة يا ناس....بمووت
قالوامش ح نسيبك إلا
بقطنة...نايم ف التابوت
والحكومة لما توعد
كان لابد توّفى دين
سابوا (خالد)
بس جثة!!
بين أيادى الدكتورين
قالوا يمكن لسه صاحى
نلحقه ...ناخد ثواب
روحه قالت...لأ...سيبونى
موتى أرحم م العذاب
المهم صحابنا دوكها
الأمين و المخبرين
جابوا إسعاف لجل تاخده
رفضوا طبعا....
ياخدوا مين!!!؟؟؟؟
النهاية..جابوا تاجربانجو
مرشد من زمان
قالوا..قول (خالد)زبونى
وكان معاه الكيس كمان
والسبب ف ثوانى يطلع
قبل ما الموضوع يبات
قالوا كان الكيس بيبلع
إتحشر جواه...فمات!!
قلنا يعنى..البانجو قتله..؟؟
قالوا طبعا..دى الصراحة!!
يعنى خلوا البانجو قاتل!!!
يا سلام..؟؟شوف البجاحة
والحكاية كوسووها
واللى رَش يا عم رَش
ف الكيس المظلوم جابوها
والقضية...طظ....فِش
قوللى مين يحمى الغلابة
م اللى مفروض يبقوا ضهر
الحكومة بحالها طاولة
والغلابة..قشاط..وزهر
ياللى قاعد تقرا خطى
كلمة واحدة حاقولها ليك
مهما تصرخ...أو توطى
جاى جاى الدور عليك
حتقول الدستور فيه مادة
تنص على مش عارف إيه
تانى يوم مش حتلاقيها
تنشطب!!؟؟
أيوه..آمال إيه
بس أقولك حاجة حلوة
فيه أمل
يمكن بعيد
يوم قيامة..الكل واقف
الملوك ويـــّا العبيد
لما حينادى المنادى
خد كتابك بين إيديك
قوللى ياللى قتلت (خالد)
حتقول إيه لما يناديك
يومها يابا مافيش سيادتك
أو سعادتك أو يا بيه
فيه فلان و امك فلانة
عملك اللى حتلاقيه
نفسى اموت زيك يا (خالد)
والشهادة تكون ختام
بس ياللى قتلته قوللى
إنت عارف يوم...تنام؟؟؟؟؟؟
.jpg)
18 قول رأيك:
مهما تصرخ...أو توطى
جاى جاى الدور عليك
حتقول الدستور فيه مادة
تنص على مش عارف إيه
تانى يوم مش حتلاقيها
تنشطب!!؟؟
أيوه..آمال إيه
بس أقولك حاجة حلوة
فيه أمل
يمكن بعيد
يوم قيامة..الكل واقف
الملوك ويـــّا العبيد
لما حينادى المنادى
خد كتابك بين إيديك
قوللى ياللى قتلت (خالد)
حتقول إيه لما يناديك
يومها يابا مافيش سيادتك
أو سعادتك أو يا بيه
فيه فلان و امك فلانة
عملك اللى حتلاقيه
نفسى اموت زيك يا (خالد)
والشهادة تكون ختام
بس ياللى قتلته قوللى
إنت عارف يوم...تنام؟؟؟؟؟؟
.........................
القصيدة كلها جمييييييييييلة جدا جدا جدا
ودى الخلاصة بجد
الظلم كتر أوى بشكل مبالغ فيه
ظلم بافترا مش ظلم عادى
بس بجد كل ما بتضييق اوى كده بحس ان الفرج قريب
هانت اوى ان شاء الله
وكل ظالم هناخد حقنا منه يوم القيامة
يوم القيامة لا فيه تزوير ولا طب شرعى مرتشى ولا اى حاجة
هو يوم الحق
وان شاء الله الفرج قريب
ربنا كبير
تحياتى وتقديرى اخى الفاضل
جميلة اوى رغم وجعها
وتعرف السؤال ده دايما بسأله ازاى الظالم بيقدر ينام!!!
ملحوظة: هنزل تنويه عن هذه القصيدة ولكن غداً بإذن الله فى موضوعى الجديد
السلام عليكم و رحمة الله و بركاته
ما شاء الله ...
جميلة فعلا القصيدة و مدونة حضرتك ممتازة .. عجبتنى أوى قصيدة الشيطان ..
ربنا يبارك فيك و يبارك لك فى موهبتك
تحياتى
طبعا الموضوع صعب التعليق عليه
غير ان ربنا يرحمه
و يصبرنا
بس ياللى قتلته قوللى
إنت عارف يوم...تنام؟؟؟؟؟؟
========================
اه طبعا عارف ينام وملىء جفونه كمان
بس يوم حساب أمثاله طويل و الله المستعان
مدونة جميلة
أسأل الله لنا دوام التواصل
هتنفد ازاى
تحياتى
====
كل ما انظر لحالنا الموحول اتفرس !!!!!!ولم نعد قادر لا ابالى/
فكلنا نشكو بمرارة وبكل حرارة من عيوب ظاهرة واضحة قبالى/
واحنا السبب فبه وبلا غضب فاحنا الظالمين والمظلومين بالتالى/
والمميزات ان وجدت فبالقطارة بعد ان هجرنا الحضارةوطوالى/
وعيوبنا نسخة بالكربون يتساوى فيها الفقيرمع الخولى والوالى/
ومن اصدق ما عبر عننا ابن خلدون درة تاج الخالدون الغوالى/
فمن حبنا للفخر سكبنا علينا ما ليس فينا من باب الفشخرة والتعالى/
وحولنا التقصير والاهمال الى قصور وابراج وزيناها بالامالى/
ولن ينصلح حالنا الاباعترافنا بخرابنا وخيبتنا فى كل شى ومجالى/
ثم نبد أ الاصلاح والكفاح فان انتصرنا على انفسنا انتصرنا فى ثوانى
هاااااااااااااااااايل
وجعت قلبى عليه زياده ماهو موجوع
تسلم يارب
انا قرأت التدوينة دي الاسبوع الي فات زي ما وعدتك .... بس بصراحة ... معرفتش اكتب اي رد ...
الاكتأب واليأس شلو ايدي....
نفسي اقولك تسلم ايدك.... بس حزني سيطر علي كل اطراء ممكن تسمعو مني
معلش يا صحبي ... اعزرني
احساس جميل اوى
ان لسه فيه ناس بتحس بعض
وبتكتب عشان بعض
يافرحت خالد بيك انه لسه فى ناس بتنادى باسمه
والى زى خالد كتير على رائيك كده او كده الدورعلى كل واحد فينا بس ياترى هبيموت شهيد ولا هيكون نصيبه ويا الحميره
فى نهايا هنعرف هنعرف
يوم القيامه يوم المصير
وزى ماقولت فى امل بكره يمكن بكره لسه بعيد بس بكره هيجى عليه يوم وهيجى وكل واحد مهم هيف فى دوره يستنى معاده
تقبلى مرورى واعجابى بالمدونه
أاااااااااااه يا بلد اااااااه ..
مات الولد فى صباه ..
مات يا بلد مات الولد
و فات لنا عار جبننا .. لو سكتنا
لو كتمنا خوفنا .. و نسيناه ..
يبقى موتنا والله ارحم من دى حياة ..
تسلم ايديك اخى و جزاك الله كل الخير يا رب و رحم خالد بواسع رحمته و اخذ بثأره يارب ممن قتلوه جميعا ..و اللهم أمه و أهله و أحبائهالصبر و السلوان ..
أعتذر عن تأخيرى .. كنت مبتعده لفتره ..
تحياتى الدائمه لك
يا واحد انت عبرت بقصيده مليئة بالشجن واللوعه عن ظلم بين وكذب مفضوح يراد تسويقه بإصرار لتمميع القضيه ...ومن ثم بث الرعب فى قلب كل مجترىء على القتله وعصابة الاغتيال كنت فى سفر وسمعت على الهواء من البى بى سى وصف فعلى للحشود الأمنيه الهائلة لمواجهة المظاهرة الحاشده حول مسجد سيدى جابر والتى رأسها البرادعى ..فلماذا يخشى القتلة تجمع الناس للتعبير عن الرفض ؟؟
روحه قالت...لأ...سيبونى
موتى أرحم م العذاب
هنيئاً له الشهادة
وويل لمن قتله
يوم الحساب
رمضان كريم
وكل عام وانتم بخير :)
حلو قوى الكلام دا
بسم الله الرحمن الرحيم
يشرفنى زيارتك لمدونتى
( أمــــى )المدونة مسلسلة من 1: 11
عيد سعيد يا واحد من البلد دي
تسلم ويسلم قلمك
ربنا يوفقك
شوفت بقى القصايد الحلوة جاءت بنتائج عظيمه ازاى ...خالد سعيد ده كان من شرارات الثوره والمجموعه اللى سمت نفسها كلنا خالد سعيد كانت هى الحاشده لشباب يناير ...يعنى انت حاتروح فى ابو نكله لو الثوره المضاده نجحت وعادت شلة البهوات للحكم ..سمى نفسك بقى واحد من البلد اللى جنب البلد دى
إرسال تعليق