إبليس ..بيحبك
أحبك يا مسلم يا ناسى الفروض
أحبك بتكدب و خاين وعود
بحبك تنكت و احبك تبكت
واحبك تمجد ف نسل القرود
أحبك مطنش لصوت الآدان
واحبك تبصبص لبنت الجيران
بحبك آلاتى..آنونجى وناياتى
واحبك فلاتى وواد أولعوبان
أحبك بتضرب سجاير حشيش
وفى الحر تهرب لشرم و عريش
بتصرف كاشاتك و عايش حياتك
يقولوا زكاتك..تقول لأ مفيش
أحبك بتحلف..عليا الطلاق
وتلعن ديانتك ف وقت الخناق
واحبك حرامى بتسمع كلامى
كأنك محامى و بيننا إتفاق
أحبك تظبط دماغك تمام
وبعدين تلخبط بأوسخ كلام
بحتة حشيشة..حجر تحته شيشة
تبيع الغويشة بتاعة المدام
واحبك تخلف و ترمى العيال
يمدوا ف إيديهم بذل السؤال
يعيشوا برزالة على الخلق عالة
وفوق كوم زبالة يعبوا الشوال
واحبك بتفسد صحابك كمان
تساعد شوية..أخوك الشيطان
تقول هوب ياللا..تعالوا يا شلة
معايا المجلة..بتاعة زمااان
وأكره ما أكره جنابك تتوب
وترجع بقلبك لربك تنوب
تقوم تقرا آية ..وتخلف معايا
تنول الهداية و تنسى الذنوب
وربك ما اسيبك تتوب أو تروق
وقلبك حلاوة إيمانك يدوق
حازود ف همك و حابليك و اغمك
دا انا جوه دمك فى مجرى العروق
وإياك ل(مكة)تفكر تروح
وقدام(نبيك)بسرك تبوح
تنوّر ملامحك و ربك يسامحك
بعمرة و حجة و توبة نصوح
وبعد امّا ترجع بكام يوم تمام
وتنسى الطواف و الوقوف و المقام
بنرجع حبايب..وتعمل نصايب
ويصبح يا خايب حلالك حرام
وشوف يا ابن آدم حاقولك كمان
أبوك كان فى جنة..ف أجمل مكان
عشان ذنب واحد..بقى هوه ابوكم
وانا بذنب واحد..بقيت الشيطان
.jpg)
25 قول رأيك:
ممكن نعمل حاجة حلوة قوى
لما حد يجى يعمل حاجة غلط يفتكر الكلام دا وان بجد الشيطان بيفرح قوى
ونقول لا نتحدى الفرح دا ونعمل الصح
راااااااااااااائعه
أي والله
تحياتي لك
لازم دايما نفتكر ان الشيطان هو عدونا الحقيقى
اللى احنا لازم نحاربه بكل مااوتينا من قوة
الاخت الغالية..ندا منير
اهلا بيكى بعد طول غياب
الموقف ده فعلا انا باتخيله بالذات لما حد بيحاول يستفزنى...اقول فى نفسى كأنى باكلم الشيطان..؟؟
برضه مش حاتخانق معاه بالعند فيك
هههههههههه
دمتى فى حفظ الله
~~~~~~~~~~~~~~~~
الباشا..واحد من الناس
ربنا يكرمك
فما توفيقى الا بالله
أى و الله
هههههههههه
نورتنى يا باشا
دمت فى حفظ الله
~~~~~~~~~~~~~~~
الزائر الدائم و الصديق الجميل
مدحت محمد
برافو عليك يا مدحت
عندك حق طبعا و يا ريت كلنا نعمل كده فعلا..
تخيل لو كلنا عملنا كده
يحصل اييييييييييييه؟؟؟؟
دمت فى حفظ الله
بسم الله الرحمن الرحيم
السلام عليكم ورحمة الله وبركاته
جميلة جدا ورائعة
شعرتك متأثر بكتابات أحمد فؤاد نجم
آخر بيتين كانوا معبرين جدا على فكرة وأوجزوا الموضوع كله
E73
وعليكم السلام و رحمة الله و بركاته
على فكرة..
مع انى باحب (الفاجومى)جدا جدا
بس عمرى ما قريت له غير يدوب عملين تلاتة-لقلةالوقت طبعا-
يسعدنى جدا ان القصيدة عجبت حضرتك
وانا باحاول فى كل كتاباتى ان الموضوع يظل قوى للنهاية حتى لا يمل القارئ
دمتى فى حفظ الله
السلام عليكم
بجد الكلمات عجبتنى اوى
وكتير اوى من الناس عايشين فى غفله
ربنا يتوب علينا يا رب ويسامحنا ونفوق من غفلتنا
السلام عليكم .. أخى الفاضل مبدع كعادتك و رائعه كلماتك ..
دمت معبرا و مبدعا رائعا ..
تقبل تحياتى الدائمه
السلام عليكم ورحمة الله وبركاته
بصراحه بارك الله فيك وكفانا وكفاك شر الشيطان
عجبتنى المدونه اوووى
هضيفها عندى للتواصل
دمت ودام اسمك وقلمك
تحياتى
شذا الروح
الله عليك
بيعجبنى دايما فى كلماتك بساطتها رغم عمق معناها
وعجبنى اخر جزء اوى لانها فعلا تذكرة مهمة جدا
فبذنب واحد خرج ادم من الجنة
وبذنب واحد اصبح الشيطان شيطان
ربنا يرحمنا ويغفر لنا جميع ذنوبنا
حلوة جدا القصيدة دي
بجد تسلم ايدك
تقبل مروري
ريمان
وعليكم السلام و رحمة الله و بركاته
مرحبا بأختنا الغالية
فعلا يا ريمان كلامك مظبوط ..الناس أغلبها عايش فى غفلة..
ربنا يتقبل دعائك يارب و يجعله فى ميزان حسناتك إن شاء الله
دمتى فى حفظ الله
~~~~~~~~~~~~~~~~~~~~~~~
روفى
وعليكم السلام ورحمة الله وبركاته
أهلا و مرحبا بأختنا فى الله
غيابك طال علينا آوى
لكن أسامح حضرتك علشان القمرات التلاتة
هههههههههه
تعليقك يخجلنى أختاه
ربنا يكرمك ودمتى دائما فى حفظ ربى و رعايته
~~~~~~~~~~~~~~~~~
شذا الروح
وعليكم السلام و رحمة الله وبركاته
مرحبا بزائرتى الجديدة
بارك الله فى حضرتك و سائر المسلمين و كفانا جميعا شر الشيطان
يسعدنى أن القصيدة عجبت حضرتك
وإضافتى عند حضرتك شرف لمدونتى
إن شاء الله يدوم التواصل
دمتى فى حفظ الله
~~~~~~~~~~~~~~~~~~~
موناليزا
مرحبا بأختنا الصغيرة الغالية
ربنا يكرمك يا موناليزا و يعيذك من الشيطان و النفس الأمارة و الهوى
يارب
عندك حق هى تذكرة مهمة...لو الناس تتفكر فيها
ذنب واحد فقط خلى سيدنا آدم عليه السلام يهبط إلى الأرض وجعلنا جميعا من نسله..
وذنب واحد جعل الشيطان شيطانا و جعله لنا عدوا ليوم الدين..
فكيف بنا أختى فى الله مع كثرة ذنوبنا
ربنا يرحمنا..ليس لنا إلا رحمته سبحانه و تعالى فهو المطلع على أفعالنا فى السر قبل العلن
دمتى فى حفظ الله
حصان المرجيحة
أهلا بالصديق الجديد
إسلام باشا..نورت المدونة
الحصان ده صناعة تركى يا سلومة..؟؟
هههههههههههه
كويس إن القصيدة عجبتك وربنا يكرمك على الزيارةو يارب تتكرر
دمت فى حفظ الله
يااااااااه دة على كدة بيحبنى حب!!
شوف يا ابن آدم حاقولك كمان
أبوك كان فى جنة..ف أجمل مكان
عشان ذنب واحد..بقى هوه ابوكم
وانا بذنب واحد..بقيت الشيطان
واحنا بقينا ايه!!!!
تسلم جااااااااااامد اوى
فعلا معبره ولاذعة في نفس الوقت لكل من يزين له الشيطان عمله
اللهم نجنا من كيد الشيطان ووسوسته ومكره
وأرزقنا حسن الخاتمه
جزاك الله خيرا
السلام عليكم حلوة جدا القصيده وبتعبر عن حياتنا تماما فى شد وجذب مع الشيطان إلى ان يستسلم واحد منهم للاخر ربنا يثبتنا ولو إاستسلمنا علينا بالتوبه والعوده سريعا...تحياتى
كيكى عوووو
أهلا ومرحبا بأختنا الصغيرة
مشكورة زيارتك و تعليقك
فعلا..دايما باسأل نفسى السؤال ده..
إحنا بقينا إيييييييييه؟؟؟؟؟؟؟؟
دمتى فى حفظ الله
ََََََََََََََََََ~~~~~~~~~~~~~~~~~
أم البنين
أهلا ومرحبا بأختنا الكريمة
زيارة أولى مشكورة
وما توفيقى إلا بالله
ربنا يتقبل من حضرتك دعائك و يرزقنا مثله
وأرجو تكرار الزيارة ولا تنسينا من صالح دعوات حضرتك
دمتى فى حفظ الله
~~~~~~~~~~~~~~~~~~~
هيووم
وعليكم السلام و رحمة الله و بركاته
أهلا ومرحبا بالزائرة الجديدة
فعلا هناك شد وجذب مع الشيطان-لعنة الله عليه-وربنا يجعلنا من الذين لا ينجذبون اليه ابدا ويتقبل منا ومنكى توبتنا إن شاء الله
دمتى فى حفظ الله
بجد ولا اروع
رائعه بمعنى الكلمه والله احييييييييييييك
بنت مصرية
أن مش مصدق عينى..(أفرك عيونى مندهشا)
بنت مصرية عندنا...يا مرحلة يا مرحلة
هههههههههههههههه
يعلم الله كم نفتقدك أختنا الصغيرة
لا يهمنى أن تكتبى شيئا فى تعليق حضرتك..أتركيه فارغا
يكفى أن أقرأ إسم حضرتك لأطمئن على سلامتك..أدامك الله بخير
أن عارف إن الرحاب غيرتك
هههههه
دمتى فى حفظ الله
انا جايا اسلم
ربنا يعزك يارب
شرفت بيك صديق دائم لمدونتى
ومتابع جيد
ربنا يكرمك على كلامك الجميل اخى الفاضل
دمت ودام احساسك
ومنتظره رئيك بالبوست الاخير
اخبار حضرتك ايه
يارب تكون بخير ويطمنى عليك
ارجوك بلاش غياب
واول ما ترجع طمنى
ياواحد انت واحد عظيم وموسيقى الشعر عندك تجرى كالماء الزلال وفيك كتير من عمنا نجم والكلام مطاوعك تماما ...سعيد جدا بقلم شعرى واضح الموهبه ومتدفق الفكرة ومميز فى توظيف المفردات العامية الشعبية الى الأمام ياواحد
الله انا هعتبرها معارضه لقصيدة شعبى حبيبى لاحمد فؤاد نجم
مع اعتراضى ورفضى لمضمون القصيده
هو بيقول ايه؟
ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك واذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك ........!
اشكرك
بجد قصيدتك احلى كتير
رائعة جدا جدا جدا
كما هى عادتك أخى الفاضل
بارك الله لك فى موهبتك ووفقك دائما لكل الخير
عندى ليك مفاجأة فى المدونة ياريت تيجى تشوفها
تحياتى وتقديرى
إرسال تعليق