ماتش كورة
ــــــــــــــــــــــــــــــــــــ
ماتش كورة خلى مصر اتوحدت و اتجمعت
و الاغانى ف كل حتة بحب مصر لعلعـــت
و اللى عينيه ما دمعتشى لما ابوه مات ..دمعت
يبقى ليه ما اتوحدتشى لما غزة .. ولعت
ــــــــــــــــــــــــــــــــــــ
جزم × جزم
ــــــــــــــــــــــــــــــــــــ
لما بوش بالجزمة ياخد ( منتظر ) يصبح بطل
و اللى كان ما بيتسطلشى يومها م الفرحة اتسطل
نلقى صحفى جه السنه دى ف مؤتمر ل ( الزيدى ) طل
يضربه بالجزمة برضه ... لأ ده منتهى الهطل
ــــــــــــــــــــــــــــــــــــ
عيد مبارك .. أو جمال
ــــــــــــــــــــــــــــــــــــ
سيبكوا من كل اللى قال
و ابقوا قولوا للعيال
السنه دى .. عيد مبارك
و اللى جاية .. عيد جمال
.jpg)
10 قول رأيك:
السلام عليكم
البلاغة في الايجاز
والأبيات رغم قلتها إلا أنها تقول كل شىء والكذا والكذا والكذات الثلاثة كلها جميلة لكن أكثر ما أعجبني
كذا الأولى
عودا أحمداً
ههههههه
سلامو عليكم
مين قالك ان السنة الجاية عيد جمال ؟
انا عندي حوالي 23 و بحب عيد مبارك جدا
هههههههههه اتعودت (;
الابيات جميلة جدا
الاخت..مجداوية
وعليكم السلام ورحمة الله وبركاته
أتفق معكى فى إعجابك بكذا الأولى
فلكم يحزننى أن يجتمع الناس على أشياء(لا تسمن ولا تغنى من جوع)و(يستبدلون الذى هو أدنى بالذى هو خير)وليس معنى ذلك أننى ضد الكرة... على العكس..أنا من ممارسيها ومشجعيها..
ولكن بما لا يتعارض مع دينى ومصالحى
مشكورة على المرور
دمتى طيبة
المعلم محمد صاحب المطعم-طعمية سخنة
وعليكم السلام ورحمة الله وبركاته
أنا أعذرك يا أخ محمدلأنك نشأت وترعرعت(كويسة ترعرعت دى)فى عهد السخاء والرخاءوالإخاء ..ربما تحب عيد مبارك وذلك لأنك(لم ترى غيره)
وحياتك إتنين طعمية من غير سلطة طماطم ولو ماعندكش سلطة طماطمأعملهم من غير سلطة طحينة
نورتنى يا باشا
حاليا انا بقيت متبع مقولة ما اسخم من ستي الا سيدي
و بالمناسبة انا معنديش طعمية اصلا ؟ اعملك طبق كشري من غير تقلية ولا صلصلة ولا دقة ؟
مختصرة وموجزة ومؤدية المعنى بشكل جميل
السلام عليكم اخى الكريم
اولا الف الف مبرووك برقيه اخر العنقود ربنا يبارك بها و يحفظها و يحميها يارب و تشوفها اجمل عروسه و يفرحك بكل اولادك و يبارك فيهم ..
اكيد عذراك لأنك ابو الاربعه ربنا يعينك و يبارك لك فيهم بس انا كمان مقصره و ارجو ان تعذرنى ايضا بما انى ام الثلاثة بنات ايضا :)
بوست جميل و لكنى اختلف معك فى كذا الاولى بالذات برغم انها جميله جداا و عجبتنى لكن اللى عاوزه اقوله ان الحكايه مش حكاية ماتش يعنى اللى حصل للمصريين فى السودان بعد الماتش انا بأعتبر انه ما لهوش دعوه بالماتش خالص ده له دعوة بكرامتنا كمصريين و طبعا ده ما يمنعش اننا ياريت نتوحد كده دايما ما كنش اصلا اللى جرى جرى ..
تحياتى الدائمه لقلمك و ابداعك و خالص دعواتى للجميله رقيه حفظها الرحمن و اخواتها من كل شر ..
الأخت الغالية ..موناليزا
كتبتها مختصرة لأن القادمة طويلة
ومنعا للزهق..
أحب أكون ضيف خفيف..
وأنا بطبيعتى ما احبش(الكلام المجعلص)
دمتى بكل خير
الأخت الغالية..روفى
حمد الله على السلامة
بارك الله لكى فى قمراتك الثلاثة وجعلهم قرة عين لكى ولأبيهم إن شاء الله ورزقهم بأزواج يكونون لكى خيرا أبناء تنجبينهم بإذن الله...
انا لست ضد الكرة عزيزتى ولكن يصعب على نفسى ان تتوحد الأمة على شيئ مثل ذلك بينما هناك مئات الأشياء كانت تستدعى التوحد بيننا..ولم نفعل..
دمتى طيبة وزائرة كريمة
فعلاً خير الكلام ما قل ودل
بوست متميز كالعادة يا شاعر
تسلم ايدك
إرسال تعليق