الاثنين، 6 أبريل 2009

شباب عاطل

شباب عاطل
~~~~~~~
شباب عاطل و متلقح ف كل مكان
لا حيلته شهادة و لا صنعة و لا بنتجان
و اهله غلابة و لا مصنع و لا فدان
و اقوله يا عم ليه عاطل ؟ يقولى ظروف

و تلقاه مرزى عالقهوة بيشرب زفت
و م القهوة ل(سيبر) يعنى انترنت
و هوب الساعة جت سته معاد البت
يروح يقابلها و يقلبها ف المصروف

و اقوله يا عم طب قوم اشتغل حاجة
بلدنا لإيدك الشغاله محتاجة
يقوم رادد بكل سفاله و سماجه
يقول طيب يا عم الحاج..بكرة نشوف

إلهى ما توعى و لا تلحق تشوف يا جلنف
عايز قلمين على الخدين بعزم الكف
تروحله تنصحه لله..يقولك إف
كأنك جاى تاخد من حضرته المصروف

و تلقى الجل فوق شعر الولا ملزق
و لابس جينز متقمط و متحزق
و من عند الركب دايب و متمزق
يقول موضه..و ياما م الموضات حنشوف

و لو فتشته ما تلاقى ف جيوبه جنيه
و عند القهوجى فاتح حساب آبونيه
و قدام البنات عامل آلاجه و بيه
و شعره ع الودان نازل تقولشى خروف

يقول حال البلد نيله و آديك شايف
يا عينى عليكى يا رجولة ف توب زايف
ماهو الهايف لابد يقول كلام هايف
و يحصل ايه لو الحلاليف تزيد حلوف

فى نفس الوقت فيه غيره شباب ياما
معاه صنعه و كمان ف العلم علامة
رجولة و جدعنة معجونة بشهامة
و لو شفته عليك هالل تقف له وقوف

تشوفه الصبح طالب علم ف الجامعه
و بعد الضهر شايل عدة اللمعه
لا مستعيب و لا طلعت عليه سمعه
تقول مكسوف ؟ يقول من ايه اكون مكسوف ؟

ما دام القرش انا جايبه بشقايا حلال
لا انا باسرق و لا بانصب و لا نشال
انا بس المهم انى اكون شغال
و بكرة بالشهادة يكونلى شان معروف

و مين عارف . ؟ ما يمكن بكره اكون دكتور
او اخد جايزة بشهادتى و اكون مشهور
و اكون بالماضى متواضع و مش مغرور
و سبحان من بإيده لكل امر صروف

سمعت يا خيبة يا ملقح على القهوة
يا غرقان جوه بحر الرغبة و الشهوة
عايزلك ع القفا ميت كف على سهوه
يا راكب فوق كتافك شياطين الخوف

قوم اتوضى و صلى ركعتين لله
و قول له  يا رب انا عبد و دعا مولاه
عشان يهديه لطريق الصح بعد ما تاه
ح تلقى حالك اتبدل..و بكره تشوف

16 قول رأيك:

واحد من البلد دى يقول...

يا جماعة
انا

مواطن مصرى نايم
ابن اخت واحد من البلد دى

هو بيبلغكم كلكم انكم وحشتوه جداااااااا
بس و الله الكمبيوتر عنده بايظ و ضغط الشغل عليه مش لاقى وقت لتصليحه حتى

و بيقول لكم متزعلوش منه انه مقصر معاكوا فالزيارات

بس بإذن الله حيحاول يرجع زى الاول و يزوركم كلكم

ادعو له

انا القصيده دى اخدتها منه بعد طلوع الروح

سلامى ليكم كلكم

اسلام
(مواطن مصرى نايم)

أم أحمد المصرية يقول...

أخي الفاضل واحد من البلد دي
كلام في الجون كالعادة و في انتظار عودتك بفوة و شكرا لمواطن مصري نايم علي اقناعه لك

حاجات جوايا يقول...

قوم اتوضى و صلى ركعتين لله
و قول له يا رب انا عبد و دعا مولاه
عشان يهديه لطريق الصح بعد ما تاه
ح تلقى حالك اتبدل..و بكره تشوف


دى الخلاصة بجد
كلمات واقعية 100%

ألف سلامة عالكمبيوتر
فى انتظار عودتك اخى الفاضل

شكرا يا اسلام على تعبك
انت كمان محتاج حد يقنعك تنزل جديد

فى انتظار جديدكما
سالى

Empress appy يقول...

لا انا زعلانه انت مالك ومال الخروف والبتنجان لو سمحت دول ادنى من كده متقولش الالفاظ دى عليهم وبعيدن دى الفاظى من فضلك
سلم على اسلام كتير
وانت حمد لله على سلامتك بالموضوع القوى اللى عن الشباب اللى بسميهم سيس وهفأ

بـراااح يقول...

اولا شكرا يا اسلام انك ثابرت علي ما وصلتلنا القصيدة الجميلة دي.
ثانيا سلمت يداك يا واحد من البلد دي. كلمات جميلة و عميقة و عالجرح كالعادة. ادام الله عليك هذه الهبة الجميلة.
و اشكرك لانك تذكرت في كلماتك الشباب المجتهد ايضا... فكثير منا اصبح يري الصورة قاتمة حتي نسينا وجود لمحات مضيئة باعثة للامل.
تحياتي

عاشــــــ النقاب ـقــــة"نونو" يقول...

وجون وجون وجون
بس اكتب وعجبي بقى
حلوة وبتوصف الحال عظيم بتاع شباب كتير الا من رحم ربي
اللهم اهدي شباب المسلمين يارب
ويرجع بالف سلامة
وجزيت خيرا اخي مواطن
تحيتي

غير معرف يقول...

تحفه بصراحه
عجبتنى جدا

غير معرف يقول...

تحفه وجميله ومستنيه الجيد كله وتسلم يا اسلام يارب

ايويه الصغنونه يقول...

جميله اوى اوى يا خالى وبجد انت افكارك كلها واقعيه وموجوده وشكرا يااسلام على مجهودك

بنت مصريه يقول...

استاذنا
ازيك يا استاذنا وحشتنا ابداعاتك والله
بجد شعر جميل جدا جدا جدا جدا
احييكيا استاذى

مجداوية يقول...

السلام عليكم

السهل الممتنع
كلام سلس ودمه خفيف وفيه مليون حكمة !!!

وفي انتظار اصلاح الكمبيوتر اللي طال دى حركة 6 ديسمبر قربت ولسه بايظ !!؟؟

:)

Tadwina يقول...

مرحباً / واحد من البلد دي
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1490

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

ناجي العلي 2000 يقول...

ياااااااااااه
الله عليك يا باشا
واحشني جداً والله
يا تري فاكرني ؟؟؟
انا حبيبك ابو النوج :)
لا خلاص ماتعيطش ...
عارف عارف انك ها تطير من الفرحة
D:
واحشني جدا جدا ونفسي اكلمك والله

بنت مصريه يقول...

ازيك يا اسلام
وازاى استاذنا قولله انه وحشنا قوى
وغيابه طال قوى
يا رب يرجع بالسلامه
القصيده حلوه قوى تحياتى

Unknown يقول...

السلام عليكم ورحمة
الله تعالى وبركاتــه
سمعت الأن! بل قرأت:)
ان الله قد رزقك ب(رقية)
فأحببت ان ابارك لك
ما قد انعم الله عليك
به.اسعدك الله بأطفالك
وجعلهم قرة عين لكم.

الحلم العربي يقول...

جميلة قوي