الأربعاء، 16 ديسمبر، 2009

رسالة إلى الوالى

يا عم الحاج ابوس إيدك
كفاية تذل ف عبيدك
مانيش قادر على نفاقك
وتبجيلك وتمجيدك
-
يا مش سامع نصيحة لحد
وخليتنا لطمنا الخد
ومش عارفين آخرها معاك
ماهوانت يا تتهدى يا تتهد
-
وبتسلمنا جيل ورا جيل
إيشى لعاطف وايشى لخليل
وجبتلنا المرض أنواع
من الزرع اللى بالمحاليل
-
ومن أيام جدود جدى
عايش تاخد ما يوم تدى
ف عيد شرطة ف عيد عمال
تقول أحلى العهود عهدى
-
ف عهدك طبعا الصحة
مافيش بقى داعى نفضحها
وزير الصحة ذات نفسه
بقى عنده البعيد كحة
-
مجارى وصرف ع الترعة
وعلة وأوبئة ترعى
وييجى المصل مجانا
ويتباع لى كما السلعة
-
وأنفلونزا جت للطير
ومن بعديها للخنازير
ده من أيام أفندينا
إلهى يصبحه بالخير
-
ماكنا نشوف مرض ولا داء
ولا نخاف نبتلى بوباء
لا كان فيه فيفى ولا دينا
ولا نانسى ولا هيفاء
-
أنافقك وبأمارة إيه؟؟
من العيش اللى بالأبونيه
وبعد ما اجيبه بالضالين
أكل نصه ونصه ارميه
-
وسرقة ونهب بالزوفة
وألف حكاية معروفة
ومين هرب ومين خرب
ولكح زى شلوفة
-
ديوننا متلتلة بالكوم
وراسك ناشفة زى الدوم
ضرايبنا فارضها حبوب
تسد النفس قبل النوم
-
وميت إعلان عن الترشيد
وعصمت زيه زى رشيد
رقيب قاعد..مافيش حسنات
وتعبان م الكتابة عتيد
-
تصدق..كنت انا حالف
لايوم اشجب ولا اخالف
وقلت زيادة ف التأكيد
أقص لسانى لو زالف
-
وقلت ايديا أقصرها
وع الماضى أحسرها
قالولى العلة ف دماغك
ويستحسن تكسرها
-
ولو حتى ح اكون مرحوم
حتفضل برضه روحى تحوم
على المجلس فوق القبة
واشوف من سقفها المخروم
-
وتبعت حد يندهلى
واقول يا روحى تستاهلى
لكن أرجوك تسيبلى يومين
أسلم فيها على أهلى

20 قول رأيك:

المعلم محمد صاحب المطعم - طعمية سخنة يقول...

اولكشي؟

المعلم محمد صاحب المطعم - طعمية سخنة يقول...

هيييييييييييييييييييه

المعلم محمد صاحب المطعم - طعمية سخنة يقول...

يا رب عم الحاج يسمع
بس بلاش ياخد قرار ايجابي باعدام المنافقين امثالنا
القصيدة كلها جامدة اوووووووووووووووووووووووووووووووي

هههههه بس لما جيت اكتب عندي سياسي محدش عبرني !


تحياتي

واحد من البلد دى يقول...

المعلم محمد صاحب المطعم-طعمية سخنة

دايما منورنى يا محمد

بس على فكرة..انا عكسك خالص

لو قريت بوستاتى القديمة
حتعرف من التعليقات والزيارات ان كل اصدقاء المدونة بيفضلوا انى اكتب عامية..
سواء سياسى او اجتماعى

الحكاية فى خفة الالفاظ..لانى مابعرفش اكتب شعر كلكوعى..
احب كل الناس يوصلهم شعرى دوغرى بدون فهامات..

نورتنى يا باشا

فشكووول يقول...

ازيك يا بلدياتى .. مش برضه احنا بلديات .. والله خايف لا يقولوا لنا انتم كلكم مش من البلد دى واننا احنا الوالى طبعا اللى قصدى عليه واصحاب الوالى وولاد الوالد وحاشية الوالى .. يقولوا لنا ما لكوش عيش فى البلد دى انجروا روحوا ضوروا لكم على بلد تانيه ياغجر .. الغجر هو احنا طبعا.

اشكرك على اهتمامك بى وربنا يخليك ويديك الصحه .. وان شاء الله نتقابل فى لقاءات مدونين . وبعد اذنك انا اخذت اللينك بتاعك عشان احطه فى الريدر عندى

تحياتى يا بلدياتى

غير معرف يقول...

بقولك اية ياعم انتا
كلام بتقولة من امتى
ومين يفهم
ومين يعرف
غير المفروض انا وانتا
كلامك كلة عالمحسوس
ودا طبعك
ده اسلوبك
وبيه ها بعدكل كابوس
تسلم ايدك يابن الناس
والله رهفت الاحساس
بقولك ربنا يحميك
ويبعد عنك كك شر الناس
(حسام)

موناليزا يقول...

:) تحسها مليئة بالخيرات

maxbeta3zaman يقول...

يا واحد
سطورك دى غاية فى الجمال وفيها من السخرية ما ذكرنى بشبابى ..وانا الحق تفاجأت بسطور أبياتك التى تعبر عن حالنا جميعا فى خفة ظل احببتها جدا ..وده حايخلينى أرجع واقرأ كل المدونة واتمعن فى محتواها من الأول ..وأرجو اعتبارى من أصدقائك المعجبين

maxbeta3zaman يقول...

كمان عاوز اقول يا واحد اننى توقفت طويلا عند قصيدتك "حبيبتى انا ماتت " وأدهشنى معناها وصياغتها وتعبيراتك فيها ...يبدو أننى أمام شاعر كبير يا واحد ...كل تحياتى لك

Asmaa Fathi يقول...

قـــــــــول يارب حد في البلد دي يسمع

عموما كل سنة وأنت طيب وسنة جديدة وسعيدة عليك وعلي أهلك

تحياتي

واحد من البلد دى يقول...

الاخ االكبير ..فشكول

تسعدنى زيارتك
بس وحياتك لو قالولنا دوروا على بلد تانية..ابقى دورلى معاك..علشان جوجل تقريبا ما يعرفش يعنى ايه(مصر)

وبعدين يا اخى انا لى الشرف انى يتحط اسمى عند حضرتك
هو فيه اخ كبير يستأذن من اخوه الصغير..

فعلا كده يبقى (مصر بتتقدم بينا)بالعكس

نورتنى

rovy يقول...

كثر الذل حقا و لكن نحن من سلمنا للظلم .. حاجات كثير مش فاهماها رغم انها ممكن تكون واضحة جداا ..
يا ترى المشكله فى الوالى و لا حكومته اللى ممكن تكون مغميه عيونه عن حقيقة ظلمهم و استبدادهم للشعب الغلبان ..
ماهو لما يجى مسئول كبير و يقول للحاكم البيوت دى لازم نهدها لمصلحة الشعب و و هذا لغرض فى نفس يعقوب مثلا ..يبقى الحق على الوالى و لا الشعب اللى اتعود يرضخ و قالوا ايه فرعنك يا فرعون قال ..
يعنى بصراحة مش قادرة الوم الوالى ..انا بألوم السكوت و الاستسلام اللى الاغلبيه العظمى بقت تستسهلوا

تحياتى لابداعك

ناجي العلي 2000 يقول...

اية الاوام ده .... اية الكلام ده
صاروخ من صواريخك الجامدة... بس ربنا يسترها عليك
وانت فاهمني :)

انت عارف انا نفسي في اية ؟؟؟
نفسي اشوف رئيس جمهورية جديد قبل ما اموت

دمت مبدع يا شاعر

حبيبك ابو النوج

واحد من البلد دى يقول...

صديقى الغالى
حسام سمير

أسعدنى مرورك وتعليقك ويا ريت تكرر الزيارة..لأنى عارف قد إيه حضرتك مشغوووووول..

دمت بخير

~~~~~~~~~~~~~~~~~~~~~~~~~~

الأخت الغالية..موناليزا

لا أعرف معنى الخيرات التى تقصدينها..
وبعد تفكير طويييييييل..قلت ربما تقصدين..الخيارات..على أساس أنها تشبه(الكوسة)

دمتى متألقة

~~~~~~~~~~~~~~~~~~~~~~~~~~

الأخ الكبير..ماكس بتاع زمان

لقد تركت قصيدتى عند حضرتك بعدما تجولت فى مدونتك الغراء ووجدتنى أمام شاعر كبير ومتذوق للشعر أيضا يستطيع أن يستنبط-كويسة يستنبط دى-ما وراء الكلمات وأرجو أن أقابلك شخصياأخى لأتشرف بحضرتك..

دمت طيبا ولمدونتى زائرا

~~~~~~~~~~~~~~~~~~~~~~~~~
أختنا العزيزة..أسماء فتحى

يارب فعلا حد يسمع..لكن أنا أعرف واحد صاحبى بيسمع نص نص..لأنه عنده ودن مقطوعة..لكن ياللا هو اللى لقيته ..على الأقل يسمع نص الكلام..ويبقى يقرا القصيدة على مرتين مثلا..

سنة سعيدة عليكى وعلى أهلك وعلى اللى يتشددلك بقى..
هههههههههههههههه
بس بجد..يعنى إيه(سعيدة)؟؟؟؟؟؟؟؟

دمتى طيبة

~~~~~~~~~~~~~~~~~~~~~~~~~~

الأخت العزيزة..روفى

أتفق معكى بأنه من الجائز أن تكون البطانة السيئة هى التى تؤثر على قرارات الحاكم,,ولكننى أسأل ..كم من الوقت يمكن أن تؤثر؟؟؟
وأعود فأسأل..هل كل البطانة سيئة..وكما قال سيدنا لوط عليه السلام(أليس منكم رجل رشيد)..
وهم فيهم رشيد فعلا لكنه ليته ما كان..
الحل لا يعلمه إلا الله..
لنا الله..... لنا الله
وكفى بالله وكيلا

دمتى طيبة
سلامى إلى قمراتك الثلاث
أعانك الله على تربيتهم

~~~~~~~~~~~~~~~~~~~~

أبو النوج..حبيبى

نفسك فى إيه يا اخويا؟؟
تشوف رئيس جمهورية جديد قبل ما تموت؟؟؟
بقى الراجل عمال يشد ويشفط ويصبغ..وبرضه مش عاجبك..

أنا بقى نفسى حفيد حفيد حفيدى يشوف اللحمة البلدى قبل ما القيامة تقوم...

ربنا يسترها علينا يا نوجى..

واحشنى يا أخى

بطل ندالة وزورنى على طول..
المدونة مدونتك

Asmaa Fathi يقول...

سعيدة يعني سعيدة صعبه دي ؟ هيه شرحه نفسها بنفسها خالص

ست البيت يقول...

أول مرور وان شاء الله مش آخر
جامدة جامدة

حلو قوي
والله أنا بستغرب كل يوم الشباب الأداباتي دا كان فين
كان مكبوس على مراوحة من كبار الكتاب اللي قددوا
الحمد لله على نعمة التدوين
عرفتنا بناس أدباء حلوين
يا خبر الشعر دا باينله عدوة

واحد من البلد دى يقول...

الأخت أسماء فتحى

أستفسر عزيزتى عن كلمة (سعيدة)
كما أستفسر عن غيرها من المسميات التى إندثرت تحت أقدام غول الإقتصاد والسياسة..مثل كلمات(ديموقراطية..إشتراكية..)وتريننى أحيانا أسأل عن معنى كلمة(مصر)..
وذلك عزيزتى على سبيل التهكم لا الجهل..

دمتى بكل خير

~~~~~~~~~~~~~~~~~~~~~~~
الزائرة الجديدة..ست البيت

المدونة نورت بتشريف حضرتك
وأنا عزيزتى أعتبر نفسى من أصاغر من يكتبون الشعر على إعتبار أنه-وكما تفضلتى -هناك كثيرا من الشعراء الموهوبين قد لا نعرفهم فى الوقت الحالى..
فلا أحب أن أضخم نفسى و أذكى موهبتى حتى لا أكتشف بعد ذلك أن تلك الموهبة لم تكن سوى سراب يظهر أمام حقيقة المواهب الأخرى..

أتمنى أن تكون مدونتى نالت إعجابك

ملحوظة..

قمت بزيارتك ولم أستطع لأن الوضع(غير متاح)
فأردت التنويه لمرورى من هنا

دمتى بكل خير

فشكووول يقول...

السلام عليكم

جيت اسلم عليك واشكرك على التعليق فى فشكول بس انت بتغيب كتير كدا ليه ؟

تحياتى وكل عام وانتم بخير

مدحت محمد يقول...

ماكنا نشوف مرض ولا داء
ولا نخاف نبتلى بوباء
لا كان فيه فيفى ولا دينا
ولا نانسى ولا هيفاء

لا
ده كان فيه سامية وتحية
وعالم واطية مش عالية

انا مش جاى واخدها دراع
ولاجاى حتى ابدى دفاع

انا مسمعتش انه قال
ده افضل العهود عهدى

ولكن بس حابب اقول
فى عصره فساد ومش معقول

ولما نيجى نتكلم

نجيب حقيقة معلومة
عشان نقدر نعالج ناس
عاشت فى حياتها مهضومة









ونأسف للاطالة
والازعاج

بنت مصريه يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
فظيعه يا استاذنا
اما نلحق نودعك بقى ههههههههه
جميله جميله جدا
انا فطست م الضحك
دمت مبدع يا استاذنا