إمتى ح نبطل...كلام
أولاً..ح اكتب كلام
ثانياً..تقرا الكلام
ثالثاً..تدخل تعلق
برضه بشوية كلام
حتى حكام الشعوب
مابقاش حيلتها إلا الكلام
يعملوا..قمة كلام
يطلعوا..بحبة كلام
واحنا طبعا ف الجرايد
تانى يوم نقرا الكلام
يبقى قاعد ف السفارة و الوزارة
يقول كلام
تلقى غيره و ف دقيقة
قال كلام غير الكلام
والحكاية بحالها تقلب
معركة ..بس بكلام
تلقى حاكم شعبه ميت
وشّه مليان إبتسام
حاضنة إيده إيد عدوه
آل بيدعوه للسلام
والسلام..إنك تفاوض
طب بإيـيـيـيـيـيـيـه؟؟؟
...برضه بكلام
يبقى قاعد آل يفاوض
زيه زى الطور تمام
هوه عارف ..بس خايف
يبقى مش قد الكلام
واللى قبله راح ف داهية
أصله ما سمعشى الكلام
تلقى كاتب للأغانى
لما يسمع الكلام
قلبه يتحرك و عقله
يقوله على حبة كلام
يكتبه..ييجى الملحن
يعجبه لفظ الكلام
والمغنى ف النهاية
نسمعه يغنى الكلام
بعد ما يخلص نقوله
بجد..الله ع الكلام
كلمتين انا نفسى اقولهم
همّا ف الآخر كلام
بس يعنى غصب عنى
اصل انا سلاحى الكلام
إسألوا فلسطين يا عالم
وإسمعوا رد الكلام
إسرائيل إزاى خدِتها
كات خدِتها بالكلام؟؟
دير ياسين.صابرا.شاتيلا
والا قانا..كات كلام؟؟؟
العراق..لبنان..وغزة
إحتلالهم كان كلام؟؟
لو(شهيد الفجر) ينطق
كان يقول أجمل كلام
إغتياله يوم شهادته
تم..برصاص الكلام؟؟
والا صدام و الحريرى
برضه ماتوا بالكلام؟؟
نفسى أسأل كل حاكم عربى
من ضمن الكلام
لو صحيح (الدُرّة)إبنك
ليه نسيته أوام أوام
ليه نسيت (شيماء)وغيرها
ضاعوا ليه وسط الكلام
نفسى أسأل كل حاكم عربى
من ضمن الكلام
ياللى بعت ف يوم ضميرك
لما بعته..قبضت كام..؟؟
وإن ضميرك لسه عايش
إمتى ح تبطل كلام
الزتون دبلان ف أرضه
وإنتحر كل الحمام
الحكاية إن المرارة ف حلقى
مش ناقصة الكلام
لو ح اقول على كل حاجة
عمر ما يكّفى الكلام
نفسى يوم أكتب قصيدة
إسمها....خِلص الكلام
.jpg)
47 قول رأيك:
سلمت يداك
من أحلى وأنضج ما قرأت لك...
ملهمة وشارحة للوضع ..التعيس الموجع
ربنا مع غزة ويجعل نار الحرب برد وسلام عليهم ويصبرهم ويزيح غمتهم
وغمتنا..
تقبل تحياتي
الله الله الله عليك
فعلا احنا مفيش في ادينا غير الكلام
لو صحي الضمير العربي مش هيبقي مجرد كلام
ربنا معاهم يارب وينصرهم
لك تحياتي
رودي
نفسى أسأل كل حاكم عربى
من ضمن الكلام
ياللى بعت ف يوم ضميرك
لما بعته..قبضت كام..؟؟
وإن ضميرك لسه عايش
إمتى ح تبطل كلام
-----------
بارك الله فيك اخى الفاضل
عندك حق كله كلام فى كلام
المظاهرات كلام
والمفاوضات كلام
والتنديدات كلام
وغزة بتنزف ومش هيداويها الكلام
رزقهم الله بالنصر المبين وابتلى عدوهم وعدونا بالهزيمة الساحقة اللهم آميييييييييين
جزاك الله كل خير
سالى
مهو اصلك لو فتشت في تاريخ العرب هتلائيهم كانوا أحسن حاجة بيعملوها سوق للكلام كان للشعر وكل واحد يستعرض عالتاني بالكلام
يبئى ايه الجديد عالكلام
بقالى كتيييييييييييييير مقريتش كلام حلو كدة....الله ينور
اخى الفاضل .. اختى الفاضلة
ندعوكم للتواصل والتفاعل مع بيان اتحاد المدونين المصريين عن احداث غزة
ربما لو نفذنا ماجاء به او بعضه نكون قد قمنا بعمل مفيد سوف يسجل لنا
ويعين اهلنا فى فلسطين عامة وغزة خاصة
فى انتظارك اهلنا يذبحون
آه . . . ثم آه
نفسى يوم اكتب قصيده
اسمها خلص الكلام
وبعد ميخلص
آه لو ادين الكلام
حبة اهتمام
حبة التزام
او حتى احترام
كان الكلام اصبح دمار
كان عمل اللى مش هنقدر نعمله بختصار
كان حمى وجهنا من العار اللى صار
بعد الحصار والانكسار
ده مجرد كلام بس ممكن يبقى رصاص
لو خليناه مليان كلام واديناله الالتزام
جميل بجد مش كلام
تقبل تحياتى
اختك
أختنا الفاضلة
أم زياد و نور
مرورك يسعدنى..
وأعلمى أختاه أننى فى أشد حالات المعاناة لما يحدث وقد أصابنى(الجمود العربى)بحالة من الإكتئاب
ولكنى لم أستطع الصمت أكثر من ذلك
تحياتى لشخصك الكريم
الأخت العزيزة..بنوتة مصرية
تعليق حضرتك يسعدنى جدا..
بس فيه كلمتين مش قادر أفهمهم..
يعنى إيه(الضمير العربى)
إنجليزى ده يا مرسى..؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
تحياتى البالغة
الصديقة الدائمة و الأخت الغالية
حاجات جوايا
أشكر لكى تذوقك للأبيات و أدعو الله بمثل ما دعوتى
لكى كل التقدير و الإحترام
الأخت الغالية
آه و كفى
أعتقد إن لقب حضرتك هو أبلغ تعليق
وحكاية السوق دى فعلا أنا ما كنتش واخد بالى منها
برافو عليكى
دايما بتخجلينى بتشريفك
بس اعذرينى لتقصيرى
عشم بقى..
تحياتى
الصديقةالعزيزة
إنجى
دايما منورانى و الله
طبعا انتم كلكم زعلانين منى لتقصيرى فى زيارتكم
بس و الله انا بازوركم لكن لضيق الوقت جدا ما باعلقش..لأنى لو علقت عند واحد ونسيت الباقى ..حيزعلوا منى
لكن انتى و الله كلك ذوق
وتواصلنا المحترم دائما هو الحلو...مش كلامى
تحياتى ليكى
إتحاد المدونين المصريين
إن شاء اللك لنا مشاركة فعالة
جعلها الله فى ميزان حسناتنا
دمتم بكل خير
وكلل الله مجهوداتكم بالنجاح إن شاء الله
الصديقة الجديدة
gana magde
تشرفت بمرور حضرتك وأرجو تكرار الزيارة
وبعدين إيه التعليق الجامد ده
أنا أبطل بقى كتابة أحسن
شرفنتى مدونتى المتواضعة
اه و اه يا اخى والف اه من الكلام
كلام بيوجع و كلام بيألم و كلامك ده اصدق كلام ..
نفسى نقدر نعمل حاجه ايجابيه مش بس كلام ..
ادعوا الرحمن ان يوفقنا جميعا و يهدينا للحق و يكون فى عون غزه الغاليه الصامده و ينصر اهلها ياارب
اخى الفاضل سلمت يداك و دامت كلماتك
الصادقه و المعبره و دام ابداعك
دمت بكل خير
خالص تقديرى و تحياتى
عايشين كلام فى كلام وفعلا بقينا مجرد كلام بس خلى بالك حتى الكلام فى يوم كمان مش هنلاقه
وتحياتى لك ولكلماتك
رغم ان القصيدة بجد جميلة
بس فعلا الكلام خِلص من زمان
ايه يا بنى الحلاوه دى .. والله انت دمك زى العسل .. فعلا احنا كلنا بقينا كلام فىكلام وبقينا معجونين فى الكلام وكأن الكلام السلاح السرى اللى طلع لنا من كام سنه كده تلاقى الكلام كلام ومحاور وبرضه كلام والموضوع ينقسم الى كذا محور ... والمحور الاول ..ز والمحور الثانى .. وبقت هيصة محاور وكلام .. بس انت نسيت ان المؤلف يسمع الكلام ويلحنه الملحن ودا ياخد فلوس ودا ياخد فلوس واحنا اللى بندفع لهم الفلوس وكله على دماغك يا شعب .. ما علهش دا برضه من ضمن الكلام .. تحياتى يا ابن الناس الطيبين
ربنا يكرمك بجد قصيده روعه
لكن ساعات الكلام بيبقى رصاصه المشكله ان الاخ ابو الغيط والاخ حسنى والاخ السورى والناس دي كلها كلامهم باااااااااااااااااااااااااااارد ابرد من التلج طيب ياريت يقولوا كلمه زي الراجل التركى الجدع ده ربنا يكرمه
الأخت الفاضلة
روفى
أشكرك جدا على التعليق
ومهما كانت ماهية الكلام
فهو فى الآخر....كلام
تحياتى البالغة لكى و لبنت حضرتك الأمورة
الأخت الغالية
رئيسة حزب الأحلام
والله انا خايف من اليوم ده
لأنه لو حصل..يبقى أنا كمان ح ابطل كتابة..
آماااال..حاكتب إييييه؟؟؟؟؟؟؟
تحياتى لحضرتك
الأخت الغالية
موناليزا
يارب فعلا يكون الكلام خلص
على الأقل نشوف حاجة جديدة
بس يارب ما تكونش..نوع آخر من الكلام
دمتى متواصلة
الأخ الكبير الغالى
فشكووول
تشرفت بزيارة حضرتك لمدونتى الصغيرة
وأتمنى أن تكون قد تجولت فيها لعل أشعارى تكون على مستوى ثقافة حضرتك
نورتنى بزيارتك وأتمنى دوام التواصل
الأخت العزيزة
جى جى
والله عندك حق
وكمان يظهر إن حضرتك ما شوفتيش الأخ المبجل الموقر القائد الرائد الوزير صاحب المعالى و الوطاطى..
صفوت الشريف..عندما زار الأخوة الفلسطينيين المصابين بمعهد ناصر
قال لأحد المصابين باللفظ و الله على ما أقول شهيد..
(علشان تعرفوا إن الرئيس مبارك دايما واقف جنبكوا و مصر دايما فاتحلكوا أبوابها)..هذا مع نظرة شذر طبعا..
الراجل رايح يعايرهم..
حاجة تفور الدم..
دمتى يقظة
الله يخليك لينا وتفضل دائماً بينا
احنا اللي بنتشرف بوجودنا في مدونة حضرتك
تحياتي
فعلا خلص الكلام .. بس لسه حكامنا بيلاقوا كلام يتقال , يبدو ان في مخزون استراتيجي منه اكتر من النفط نفسه
طبعا من اجمل القصايد اللي قرتها مؤخرا, حقيقي انت انسان جميل ومبدع بجد
تحياتي دوما
وجعتنى لدرجة انى مش عايزة اتكلم تانى
:(
السلام عليكم
الأخت الصغيرة..آه و كفى
أشكر لكى دماثة أخلاقك و رقة تعليقك
دمتى طيبة و صديقة و أختا دائمة
الأخ العزيز و الصديق الدائم
الفارس الملثم
فينك يا باشا
عاش من قرأ خطك
منورنى جدا..ماتبقاش تغيب كده تانى
أصلك من الناس اللى بتوحشنى و الله
أحبك فى الله
تحياتى لك و مشكور على تعليقك
الصديقة العائدة
وينكى
أنا آسف إنها وجعتك
بس تخيلى بقى إنها وجعتك وهى (كلام)
فما بالك بالفعل
دمتى طيبة
ما تغيبيش تانى بقى
السلام عليكم
برجاء قراءة تدوينتي الأخيرة واعطائي رأيك للآهمية
مع الشكر
ونعم انتهى وقت الكلام
هو احنا فالحين غير فيه
سلم يمناك
ربنا يسدد رمي المجاهدين يارب
ويفك عن غزة وعنا
ان شاء الله ساكون ضيفه دائمه على صفحتك
ويارب اكون ضيفه مرغوب بها
اما عن التعليق
فلما انت تبطل كتابه مين هيكتب
تقبلى تحياتى
****جنــــــــــــــى****
انا تشرفت جدا بمواطن مصري زيك كدة بيحس بالوطن العربي وحالة وليه الشرف جدا اني اعلق لأول مرة ليك رغم اني متابع اعمالك من زمان؟
وطبعا من ضمن الكلام مادام الكلام هوا السلاح اللي الشعب يملكة ؟فأنا هقولك بالكلام طبعا كلام جميل جدا بيريح شوية من الالام مهوا من ضمن الكلام منا مش شايفك بعنيا بس بقولك واللة تمام
وتاني بقولك انا بتشرف بيك وبكل عربي زيك؟
الكيان الإرهابي الصهيوني أعد لنا جيشاً من المدونين فأين جيشنا ؟
وَأَعِدُّوا لَهُمْ مَا اسْتَطَعْتُمْ مِنْ قُوَّةٍ ,,,
كلنا مقاومة
http://kollonamoqawma.blogspot.com/
الكيان الإرهابي الصهيوني أعد لنا جيشاً من المدونين فأين جيشنا ؟
وَأَعِدُّوا لَهُمْ مَا اسْتَطَعْتُمْ مِنْ قُوَّةٍ ,,,
كلنا مقاومة
http://kollonamoqawma.blogspot.com
و في وسط دايرة من الكلام
مات السلام
ومعدش فاضل غير الام
ابدعت كعادتك
(علي فكرة انا قرتها من زماااااااان و كان في مشكلة في النت وقتها و معرفتش اعلق و للمرة الثانية تبهرني كلماتها)
دمت متألقا
بجد رائع
انت لازم تعل ديوان
بجد فعلا اروع ما قرأت بجد
ربنا يكرمك يااااااااارب
رائعة
ويبقى الكلام
نعم نحن لا نجيد الا الكلام
ولكن هناك اناس لا يعرفون الكلام
بل يفعلون
وقد انتصروا
الله عليك بجد رائعة
و يارب ينتهى الكلام
تحياتى لك و لقلمك المبدع
الفارس الملثم توفى يا خالى
)':
سيدي
لم املك امام كلماتك سوى الصمت. فقد هربت الكلمات خجلا امام اتهاماتك لها و لم تترك لي سوى الصمت تعليقا.
حتي خرجت كلمه من وسط الكلمات معاتبة و مدافعة و مستشهده بقولك ان الكلمة سلاح و بسببها دخل السجون اصحاب الكلمات الشرفاء بتهمة حيازة سلاح و استعماله في مواجهه الظلم و ان الصمت هو المتهم الحقيقي لانتشار الظلم... فليست كل الكلمات ... أي كلام.
أما كلماتك فهي قوية... جميلة و واثقة الخطي أدام الله عليك نعمة صدق الاحساس و قوة التعبير عنه بالكلمات
انا نفسي تكتب قصيده اسمها خلص الدمع علشان يبدا التحرك بجد
تأخرت علينا كثيرااا
في انتظار جديد حضرتك
:)
السلام عليكم ورحمه الله وبركاته
السادة الأفاضل زوار مدونتي الأعزاء ، أساتذتي الفضلاء ، إخوتي من المدونين والمدونات ،أصدقائي الأعزاء
تحية طيبة وبعد
أتشرف بدعوتكم اليوم إلى زيارة مدونتي ( مدونة ادم ويحيى ) وذلك بصفتكم أحد الشركاء الأساسين فيها بآرائكم وتعليقاتكم على موضوعاتها وزيارتكم لها
لحضور ندوة بعنوان
( ادم ويحيى ، تجربة تدوين )
اليوم هو استفتاء على تجربة تدوين
اليوم نعرف من هو أبو يحيى وادم وكذلك ادم ويحيى من هم ومن والدتهم
اليوم نعرف حقيقة هذه المدونة وما هي رسالتها الحقيقة وهدفها
اليوم رسالة اعتذار لكم عن بعض الأمور
اليوم رسالة شكر من كل قلبي على أمور أخرى
اليوم استفتاء حول منهج مدونة ادم ويحيى
اليوم هو رسالة منكم لي حول ما طالعتموه بيوم من الأيام بهذه المدونة
فأرجوا أن لا تبخلوا على بتعليقكم على هذه ألتدوينه
في انتظار زيارتكم
والسلام عليكم ورحمة الله وبركاته
د/أبو يحيى وادم
لسه موهوب زي ما تركتك
بجد وحشتوني
في انتظاركم تزوروني
إرسال تعليق