الجمعة، 25 أبريل، 2008

مولد يا دنيا



مولد يا دنيا

___________


مولد يا دنيا وناس ياما ----------تقولش قيامة
وسالمة يابا ويا سلامة ---------والناس ماشيين

اوام اوام إتلموا يا ناس ---------من كل اجناس
الليلة مولد ابوالعباس -----------كلنا رايحيين

الست أحلام و بناتها -----------واخدة حماتها
ورايحة هيه وشلتها----------- قول ييجى ستين

واخدين معاهم فتحية------------- بنت بهية
أصل إبنها وجوزها وهيه-------- زى المجانين

عليها آل جنى سودانى ----------وبتقول يانى
دا كلام سمعته انا بودانى -------واحلف به يمين

والحاج حمدى والاضيشه --------نافش ريشه
وفارشلى مرتبته و خيشه --------للمنجعصين

وإبنه اللى جابه من التالتة-------- اهو جه فالتة
واهو مرمى جنبه فوق الشلتة------ أهبل وتخين

والحاج سعد معاه الشنطة -------وجاى من طنطا
ما ينوبه غير شيلة وحاطة --------زى التانيين

والواد حجازى إبن العمدة --------وامه اللمضة
جايبة القفص بزيارة جامدة -------من بط سمين

وكل واحد كان منحوس -------مش لاقى فلوس
جاى ف الضريح عمال بيبوس ----ومدد يا حسين

غير الدسوقى وابو الدردار------- والله ما هزار
يوم ف السنة الكل بيتزار-------- م البنى آدمين

والسيد البدوى يا سيدنا--------- وده يوم عيدنا
نرجع بحمصنا ف إيدنا ----------وحلاوة وتين

ناس الموالد شغلتها------------ وكارها وبيتها
تقلب الناس ف ساعتها-------- والناس مجانين

بقى كل راجل وولية-------------- عنده رزية
يروح يزور الأوليا------------ ومعاه التموين

الناس يا ناس مخها ضلم----------- كله مبلم
والأمى زى المتعلم------------ بقوا متساويين

الأوليا طبعا ناسنا------------ تاج فوق راسنا
بس الإيمان برضه أساسنا----- وبنعيش بالدين

لو حاجة عايز تطلبها --------- يبقى إحسبها
واطلبها م اللى بيوهبها---------- للبنى آدمين

ولو ف يوم كنت ف زنقة------- وجاتلك خنقة
(إفتح أوام مصحف تلقى-------- (يوسف)و(يس

الآوله ح تزيل كربك -------------يرتاح قلبك
والتانية ح تحقق طلبك--------- لو كان ملايين

إرجع لربك ح يعيينك -----------وانصر دينك
وقبل ما تخطى يمينك -----------شوف رايح فين

63 قول رأيك:

مواطن مصرى نايم يقول...

ايه الحلاوة دى
بجد جامده جدا جدا جدا
يا ابو مودى
بجد و الله فى الصميم
انا شايف المنظر اللى انت بتوصفه فيها
بس مبدع
خالى بقى و طالع لى
ههههههههههه
eslam

واحد من البلد دى يقول...

ماشى يا ابن اختى ..أنا باعديلك حاجات ياما علشان مامتك...بس التنسيق برضه غلط خلى بالك..أنا باين عليا كده حاطردك من الخدمة....هههههههه

لست أدرى يقول...

اولا اتشرفت بقراءه مدونه حضرتك

وللأسف معرفتش اقتبس جزءيه معينه من القصيده دى

بس كلها على بعضها حلوه جدا

والاهم انها ماشيه فى اكثر من اتجاه

وبتتكلم عن اكتر من شىء

مواطن مصرى نايم يقول...

تم التعديل
انت تؤمر يا ابو مودى
اى خدامووووووووووووز

الفارس الملثم يقول...

هههههههههههه

لا بجد جامدة , ياراجل انت موهوب بجد , وحاجتك لازم تنزلها في ديوان او تنشرها

تسلم ايدك

تحياتي
محمد

واحد من البلد دى يقول...

لست أدرى.
أنا اللى إتشرفت بزيارتك...نورتنى يا جميل..والقصيدة بتتكلم عن شيئ واحد على فكرة..وهو إتجاه كثير من الناس للخرافات وزيارة الأولياء تقربنا لله سبحانه وتعالى...بينما هم لا يدركون أن الله قريب أكثر مما يتصورون ولا يحتاج إلى وساطة للتقرب إليه....أرجو تكرار الزيارة
ــــــــــــــــــــــــــ
الفارس باشا الملثم.
دايما كده بتخجلنى بتعليقاتك يا عم دواوين إيه..وبعدين أنا لو نزلت أشعارى فى ديوان كل أصدقاء البلوج حينسونى..لأنهم ما عندهمش وقت يشتروا دواوين ويقعدوا يقروها..يا عم إحنا كده قشطة..نورتنى يا باشا

appy يقول...

ههههههههههه
هو اسلاااام النايم ده ابن اختك
طيب بزمتك حد يسيب لواحد نايم المدونة بتاعته طيب حرام ههههههههههخخخخخخخخ
لا بجد حلو اللفته الدينيه وعندك حق فيها فعلا الناس مش فاهمين بس خدوها عادات تسلم ايديك قولى ولو عمل اسلام حاجه ابعته على الكوكب وانا اعلقه على الباب خخخخخخخخخ

Miss. Sosa يقول...

السلام عليكم

حلوة اوى البوست ده

كلمات موزونة وهادفة والوزن مااخلش بالمعنى

واصل الكتابة علشان تمتعنا وتصقل قلمك

تحياتى

واحد من البلد دى يقول...

آبى.الجميلة.
بلاش الصواريخ بينى وبين إبن أختى..هو نايم صحيح..لكن أنا باصحيه لما أكون عايز حاجة..وهو أنتى لما تعلقيه على باب الكوكب يعنى أنا حاسيبك..دى فيها قطع علاقات أسرية يا بنتى..عموما ..الناس بقى عندها معتقدات من أيام جدود جدودنا وعايزين الحرية آل..جتنا ستين...ستين ليه؟؟ جتنا تمانين مليون خيبة.إلا عشرين مثلا..علشان البلوجاتية أصحابى ما يزعلوش..نورتى يا سكرة

واحد من البلد دى يقول...

ميس سوسا.
بما إنك أول زيارة أسمحيلى أرحب بحضرتك ترحيب خاص..مرورك أسعدنى..وأرجو تكرار الزيارة

مدحت محمد يقول...

موضوع زيارة الاوليا ده طبعا جميل التقرب من ال البيت والصالحين
لكن
فى بعض الناس بيبقو منافقين شوية اهتماماتهم النصب والاحتيال
الى جانب انى فى ناس بتعمل حاجات بتخالف الشرع انا بتفق معاك
وربنا يهدى
اسلوبك جميل وومتع
تقبل تحياتى وتقديرى

واحد من البلد دى يقول...

مدحت محمد.
يحسب لك حرصك على زيارتى..ودايما يا رب منورتى كده..اشكرك على التعليق..واتمنى دوام التواصل

ام الابناء يقول...

السلام عليكم ورحمة الله وبركاته

هذه اول زيارة لى وان شاء الله لن تكون الاخيرة
بجد كلمات جميله ومعبرةعن ما وصل ايه عقول الناس الان من زيارة للاولياء وما يحدث منهم من مهازل
جزاك الله خيرا وفتح عليك

واحد من البلد دى يقول...

عزيزتى أم الأبناء.
الموضوع فعلا بقى مستفز..وخصوصا فى الفلاحين..
والله الحكومة لها حق تعمل فى الناس أكتر من كده...شرفتينى ونورتينى بالزيارة

Gannah يقول...

أخى الكريم
جزاك الله خيرا على هذه الابيات
ويا ريت مدارسنا تهتم بتدريس التوحيد لانه مهم جدا
موضوع زيارة الاولياء و الاستعانة باصحاب القبور لفك الكربات و قضاء الحاجات حتى لو كانوا من البيت النبوى يدخل فى الشرك المنهى عنه ..فاذا سألت فاسأل الله و اذا استعنت فاستعن بالله..كلام الرسول صلى الله عليه و سلم واضح
المشكلة ان أئمة المساجد لا يهتمون بهذه الموضوعات التى تمثل اساسيات العقيدة
و الدولة تشجع الموالد التى تمثل بدع ما أنزل الله بها من سلطان
أحييك لطرح الموضوع و جعله الله فى ميزان حسناتك

رئـــــيسـة حزب الأحلام يقول...

السلام عليكم
بجدا لدنيا مولد وصاحبة غايب ولحد امتى هنفضل عايشين فى مولد وضايعين بين الموالد

mady يقول...

حلوه قوي قوي
جامده بجد
يارب الناس تركب نضارات
عشان نترحم بقي

monaliza يقول...

تصفييق حاااااااد
مبدأيا اناماليش فى الشعر بس بيجذبنى الكلمات بغض النظر عن القوافى وحاجات الشعر المعروفة عشان لما هتلاقينى بعلق على الكلمات والموضوع بصفة عامة متفكرش ان ده تقليل من قيمته ولكنه جهل منى به
تعليقى بقى هيكون على قسمين
القسم الاول وهو يمثل الشطور الاولى:بجد ايه الزحمة دى والناس الكتير دى كلها وفين عقلهم اللى يخلى كل الفئات تجتمع فى مكان واحد لشئ خرافى
ربنا يهدينا جميعا
القسم التانى:اخر 3شطور
بجد مفيش كلام يقدر يوصف احساسى بيهم
قد ايه وصلت رسالة بطريقة بسيطة ونصحت من غير ماحد يشعر ان ده مقصدك
بورك قلمك ودمت بخير

ناجي العلي 2000 يقول...

لله يا يا سيدي ... يعجبني فيك موضيعك وكلامك الي ديماً في الجون

في انتظار المزيد ... اوعي تبخل علينا احيات ولدك

:)

rovy يقول...

الله الله بجد ما شاء الله
حلوه قوى وجامده قوى قلبا وقالبا
كلمات جميله ومحتواها اجمل واجمل .
ربنا يوفقك ودايما نقرأ لك و تسعدنا
وياريت نبطل عاداتنا الخايبه
اللى خليتنا من سؤ الى اسؤ
ونلجأ دايما للرحمن الله الواحد القهار وبس .
يا رب يبارك لك فى موهبتك و فيك
دمت بخير
خالص تقديرى
rovy

عاليا حليم يقول...

الحاج فتحى - الحاج السعد - فتحية -الراجل الى اجوز تلاتة و الست و الى ساحبة ستين و هم عيالها

صحيح انت واحد من البلد دى :)

Zianour يقول...

جميل قوي قوي قوي البوست ده او بمعنى ادق القصيدة دي
بس انا بقى بحب الموالد بس عمري ما رحتها بس بحب ازور الحسين مش عشان يحقق لي حاجة بحس ان قلب مصر وقلب الناس الضعيف هناك .. كل واحد له حاجة .. وكا واحد عنده امل .. بحب اروح عشان الناس الطيبة - وربنا يبعد عنك الحرامية!!!
بس الصور تحفة انا بحس انك بارع قوي في استدعاء الصور دي من ذاكرتنا ووعينا
بالتوفيق ومستنية المزيد ..
زيانور

كوارث يقول...

ما شاء الله ..
قصيدة رائعة يا واحد من البلد دي
حسيت ان الوزن مختل شوية بس ده لا ينقص من روعةى القصيدة شيء
ليها مسار معين محبب .. لدرجة اني تجاهلت التحذير واحتفظت بنسخه منّها بس على جهازي وباسم واحد من البلد دي
شكرًا مؤخرًا

واحد من البلد دى يقول...

جنة.
الموضوع بجد مهم جدا..لكن المدارس تتلقى تعليماتها من اللى ربنا يرحمنا منهم.....دمتى صديقة
ْْْْ~~~~~~~~~~~~~~~~~~~~~~~~
رئيسة حزب الأحلام.
لغاية ما ييجى حد يهد الضريح اللى بندور حواليه ونتمسح فيه..إنتى فاهمانى طبعا..وطبعا طبعا شرفتينى كالعادة
~~~~~~~~~~~~~~~~~~~~~~~~
مادى.
الناس محتاجة نضارات فى عقولها مش على عينها..نورتينى بزيارتك
~~~~~~~~~~~~~~~~~~~~~~~~
موناليزا الغالية.
أنا مش عايز من تعليقك غير الكلمة الأخيرة(بورك قلمك)لأن أى واحد ممكن تكون موهبته نقمة عليه-وربما على الناس-ربنا يكرمك
~~~~~~~~~~~~~~~~~~~~~~~~
ناجى العلى.
أنا برضه اللى بخيل.يا راجل ده الخازوق بتاعك السوس أكله...فين البوست الجديد يا كسوووووووووووول ههههههههه شرفت يا عسول
~~~~~~~~~~~~~~~~~~~~~~~
روفى.
ربنا يخليكىيا سكر.زيارتك بتحسسنى إنى فنان بجد.مع إنى لسه(على قدى)..دام تواصلك
~~~~~~~~~~~~~~~~~~~~~~~
عاليا حليم.
من أسعد التعليقات اللى وصلتنى-لأنها أول زيارة ليكى-تعليقك شرف المدونة...دمتى زائرة
~~~~~~~~~~~~~~~~~~~~~~
زيانور.
الحب الذى نحمله فى قلوبنا للأولياء أو أهل بيت النبوةعميق...ولكن يجب أن يكون فى حدود التوحيد فأنا معارضتى لطريقة التعبير عن هذا الحب..وإتخاذ الأضرحة مساجد....وبعدين بعيد عن البوست..حضرتك كسلانة ليه؟؟فين الجديد...مرحبا بكى فى مدونتك
~~~~~~~~~~~~~~~~~~~~~~~

واحد من البلد دى يقول...

الأستاذ كوارث.
أهلا بك زائرا لأول مرة..وتوضيحا لمسألة وزن القصيدة..المشكلة الأزلية اللى بتقابلنى وبتكون سبب فى مليون سؤال زى بتاع حضرتك هى التشكيل فى الكتابة...وأى واحد بيكتب زجل أو شعر بيعرف يوزن القصيدة وهو بيقراها...فالقصيدة يا صديقى ليس بها أى خلل بالنسبة للوزن...وفى الزجل بالذات يعتمد الوزن على القراءة حيث تتحكم اللهجات المختلفة فى وزن القصيدة....ومثال على ذلك ما جاء فى هذه القصيدة(دا كلام سمعته انا بودانى.....واحلف به يمين)...لفظ(به)ينطق حرفا واحدا بضم الشفتين على طريقة نطق الأجداد....وإذا كسرنا الهاء كطريقة نطقنا ..أخلت الوزن...أرجو أن أكون قد أفدتك وأوضحت لك قصدى...وبالنسبة للنسخة اللى إنت أخذتها..ولا يهمك..بس كنت قوللى قبلها..بس أنا حاعتبرها هدية أول زيارة...بدل ما أعمل شاى وأتعب نفسى...وعموما أنا موضوع النسخ ده ما بيفرقش معايا لأنى أى حاجة باكتبها باسجلها (شهر عقارى )قبل ما انزلها....شرفتنى يا جمييييل

جيهان علي يقول...

السلام عليكم ورحمة الله وبركاته

جميلة جدًا
وفكرتها حلوة وبتعبر عن مشكلة موجودة عندنا بشكل مستفز

وللأسف الناس اللي بتجري ورا الدجل والأولياء وكل الكلامد ده مش مدركين أن في كدة شرك بالله - عز وجل -

ربنا يهدي

تحياتي

واحد من البلد دى يقول...

جيهان على
نورتى المدونة بالزيارة والتعليق...مبسوط إنها عجبتك...وأتمنى الزيارات تبقى كتيييير كتييييييييييييير...تحياتى ليكى

Desert cat يقول...

الكلمات جميلة والاجمل منها الاحساس اللى مكتوبة بيه بجد حسيت انى عايشاها بجد
تسلم ايدك

Desert cat يقول...

الكلمات جميلة والاجمل منها الاحساس اللى مكتوبة بيه بجد حسيت انى عايشاها بجد
تسلم ايدك

واحد من البلد دى يقول...

إيه يا قطة ؟؟إنتى كنتى حاطة كربون وإنتى بتكتبى التعليق..؟؟ نورتى يا قمر ..مع إنى زعلان منك..؟؟فين التورتة يابخييييييلة...
سلاميييييييييييز

أم أحمد المصرية يقول...

اللــــــــه حلوة جدا وزن و فكرة عجبتني جداخصوصا الجزء بتاع لو حاجة عايز تطلبها يبقي احسبها و اطلبها م اللي بيوهبها للبني ادمين
بارك الله لك في موهبتك و نفعك و نع الناس بها
خالص تحياتي

أسامة أمين يقول...

حلو اوى يا عم والله .. ناقل الواقع من غير تزويق .. اشطه يا برنس

واحد من البلد دى يقول...

أم أحمد المصرية
أعذرينى أولا أنى لا أسبق لقبك بكلمة مثل(الأخت .أو.الغالية.أو.العزيزة)وذلك لأسهل عليكى إيجاد الرد الخاص بكى حيث تبحث عينك عن حروف بعينها..
أدامك الله زائرة كريمة..وبارك لكى فى أبنائك وهداكى وهدى بكى...
مرورك أسعدنى ...دمتى بخير

واحد من البلد دى يقول...

أسامة أمين.
المدونة نورت بزيارتك وإتشرفت بمعرفتك..وإبقى شرفنى دايما وإقرا اللى فاتك بقى
...يا رب دايما مشرفنى

بنوته مصرية يقول...

عزيزي

انا جاية اشكرك علي الدعاء الجميل

وطبعا انا حروفي عاجزة عن التعبير علي ابداعك انت فعلا فنان وموهوب

بقي اسلام يطلع ابن اختك ههههههههه

طيب صحي بدل ما انت سايبة نايم كدا علطول

بشكرك وعاجزة عن الشكر

رودي

asmaa يقول...

راااااااااااائع......بجد فعلا سبحان الله ...انت وهوب بجد...برده مش اى حد يعرف يكتب...ولا كل اللى بيكتبم بيكتبم كلام رائع ومعبر كده وكمان حاسه انه ليك استايل جديد فى افكارك...بالتوفيق عقبال لما نسمع عن كتاب واحد من البلد دى الرباعيات كده...ربنا يكرمك طول ما قلمك بكتب الصح :)

حنين القلب يقول...

السلام عليكم
انا بجد ندمت على انى مش دخلت مدونتك قبل كده ايه الجماااااااااااااااااال ده معانى وكلام موزن لا بجد جامد اكتر جمله عجبتنى ...
ارجع لربك ح يعيينك....وانصر دينك
وقبل ما تخطى يمينك .....شوف رايح فين
ربنا يجزيك عن كلامك الجميل كل خير ويوفقك دايما يا رب .
سلام

حسن محمد توفيق يقول...

بسم الله ماشاء الله

اشعار جميله

ومولد يا دنيا .. شكرا لك سؤالك

وسعيد بتواصلك واتمنى الاستمرار ان شاء

الله

nonoymm يقول...

السلام عليكم
سلمت يمناك لليتهم يعلمون
كلماتك معبرة وجميلة
بارك الله فيك
اول زيارة ومتاااااااابعة باذن الله
تحياتي

حسبي الله ونعم الوكيل يقول...

جميلة أشعارك

rain man يقول...

يـــــــــا ألله !
ماأجمل هذه التجليات .. لقد أخذتني في خضمها إلى بعدٍ سحيييق ..
مميزٌ جداً هذا الأسلوب في التعبير عن الداخل .. مميز جداً
ولأن كل ما هاهنا جميل .. سأقول : بارك الله لك في هذا القلم .. وأعانك عليه فهو متعب.. وسيُشقيك

اهو ده عيبه يقول...

بجد بجد هايلة وتحسسك انك فى الجو ده فعلا
وكانى شايف المنظر ده قدامى وحساه
بالتوفيق داما ان شاء الله


مجرد سؤال:ازاى بتخلى المدونة محدش يقدر ياخد منها نسخة؟ياريت تفيدنى

Esraa Hamed يقول...

اول زيارة ليا
المدونة بجد رااااااائعة
و القصيدة تححححفة بجد ما شاء الله فعلا

عجبني اوييييي الجزء ده
لو حاجة عايز تطلبها --------- يبقى إحسبها
واطلبها م اللى بيوهبها---------- للبنى آدمين
ولو ف يوم كنت ف زنقة------- وجاتلك خنقة
(إفتح أوام مصحف تلقى-------- (يوسف)و(يس
الآوله ح تزيل كربك -------------يرتاح قلبك
والتانية ح تحقق طلبك--------- لو كان ملايين
إرجع لربك ح يعيينك -----------وانصر دينك
وقبل ما تخطى يمينك -----------شوف رايح فين


راااااائعة حقا

تحياتي لك
دمت بتألق

Esraa Hamed يقول...

عايزة اسأل حضرتك علي حاجة لو ممكن يعني

هو ازاي خليت الكلام مش بيتعمل كوبي ؟؟؟

لو ينفع تقوللي يبقي جزاك الله كل خير

مفقوعة مرارتي من حماتــــــــــــي يقول...

ايه ياعم الكلام الجامد ده
ماشاء الله عليك
كويس انك عامل حقوق ملكية

د/اجدع بنوته يقول...

جامده اوى شامه فيها نفس الريحه اللى بشمها ف قصايد الفاجومى

الكلام اللى يطلع م القلب يدخل القلب طوالى ده

تحياتى

*سمر* يقول...

ارجع لربك هيعينك ..وانصر دينك :)

اهو هو ده الكلام ..انت فى الاخر جبت المفيد ...

دمت مبدعا

واحد من البلد دى يقول...

بنوتة مصرية
لا داعى للشكر يا قمر.ده واجب كل صديق على صديقه..
وبعدين أقولك على حاجة..؟؟
الأصدقاء الحقيقيين ما بيظهروش غير فى الأوقات دى وأنا كاتب رباعية عن الموضوع ده باقول فيها
شكرا يا أزمة..مسـيرك برضه حتعــدى
بس إنتى عرفتينى مين جنبى ومين ضدى
الناس معادن يا صاحبى من دهب وحديد
الأولانى بيلمع والتانى بيصدى....عجبى

واحد من البلد دى يقول...

الزائرة الجديدة.أسماء
نورتى المدونة وأوعد حضرتك إنى إن شاء الله دايما قلمى حيكتب الصح؟
دمتى صديقتى بكل خير
~~~~~~~~~~~~~~~~~~~~~~~~
حنين القلب.
إنتى شرفتينى يا جميل والكلام الجميل اللى إنتى كاتباه أخجل تواضعى
يظهر إن عين حضرتك حلوة علشان كده شايفة كل حاجة جميلة
دمتى صديقة وأهلا بيكى فى أى وقت
~~~~~~~~~~~~~~~~~~~~~~~
الأستاذ.حسن توفيق.
لو ماكنتش أسأل على أصحابى الغاليين أسأل على مين.كان لازم أسأل وأتواصل ..آمال إيه..؟؟
سعدت جدا بزيارة حضرتك
~~~~~~~~~~~~~~~~~~~~~~~
nonoymm
أول زيارة دى بتبقى عزيزة جدا على قلبى وبتسعدنى.
ومتشكر جدا على كلام حضرتك الجميل.
دمتى متواصلة
~~~~~~~~~~~~~~~~~~~~~~~
حسبى الله ونعم الوكيل.
بل الأجمل لقب حضرتك..دمتى بكل خير
~~~~~~~~~~~~~~~~~~~~~~~
رجل المطر
لا يشقى القلم صاحبه يا أخى إلا عندما يوظفه فى غير طريق الصواب.
أسعدتنى زيارتك وتعليقك
~~~~~~~~~~~~~~~~~~~~~~~
هو ده عيبه
دايما حريصة على الزيارة والتواصل كعادتك دائما .نورتينى يا قمر
وبالنسبة لسؤالك فأنا والله قلت لإبن أختى(مواطن مصرى نايم)وهو عملهالى..أصلى بينى وبينك(وبينى وبينك ليه ما أنا كده كده إتفضحت)ماليش فى المواضيع دى خالص..قوليله وهو يجاوبك...هو خدووم جدا على فكرة..
سلامى ليكى
~~~~~~~~~~~~~~~~~~~~~~~~~
إسراء حامد
ربنا يخليكى ياسكر ودايما كده منورانى وبالنسبة لسؤالك..شوفى ردى على (هو ده عيبه)..ومش كل شوية حاسيح على نفسى بقى
هههههههههه..شرفتى المدونة
~~~~~~~~~~~~~~~~~~~~~~~~~
مفقوعة مرارة حضرتها من حماة سيادتها.
الإحترام واجب برضه..
ده حضرتك اللى مدونتك جامدة جدا وأنا على فكرة رديت على الأخ المفتكس اللى قال إنك واخدة مواضيعك من حلقات أجنبية..
كان لازم يكون عند حضرتك مرارتين..واحدة لحماتك والتانية للى زى صاحبنا ده
شرفتينى جدا..وإبقى كرريها
~~~~~~~~~~~~~~~~~~~~~~~~
د/أجدع بنوتة
والله حضرتك فعلا أجدع بنوتة علشان تشبهى (اللغوصة)اللى أنا باكتبها بالعملاق(الفاجومى)حرام عليكى..روحى بقى إعتذرى له...
أخجلتينى وشرفتينى ونورتينى
~~~~~~~~~~~~~~~~~~~~~~~~
سمر
إزيك..فينك يا سمورة ..من زمان ماحدش شايفك..وانا اقول الكهربا جاية زيادة ليه..اتاريكى منورانى..ربنا يخليكى..ودمتى صديقة دائمة

حسبي الله ونعم الوكيل يقول...

كلامك شيق وتلقائى ومنه فيه.

Sally يقول...

تسلم ايدك بجد
قصيدة تحفة
فيه ناس فعلا عقلها مضلم رغم كل الحضارة اللى عايشين فيها
وياريت تيجى على أد الأوليا
دول كمان لسه بيقروا الكف ويوشوشوا الودع ويقروا الفنجان ويفتحوا المندل

عادات متوارثة غريبة
ربنا يهدى المسلمين وميضحكوش علينا الغرب ويقولوا علينا وثنيين

دام ابداعك اخى
ودمت بخير
سالى

بنت مصريه يقول...

ههههههههههههههههههههههههههههه
الله الله الله الله عليك بجد
دا انت جامد قوى والله
لا بجد ليه متكتبش ف الدستور دا انت بجد رائع
ربنا يخليلك موهبتك يا رب ويدمها عليك نعمه ويزودها كمان وكمان

Tamer Nabil يقول...

رغم انة موضوع نابع ومنتشر منذ زمن واكثر من مرة الناس الفاهمة تتكلم وتحذر منة الا مفيش فايدة

باين وواضح ان بعض الناس لاتسطيع الاستغناء عن بعض العادات رغم ثبات عدم صحيتها

تسلم ايدك ياصاحبى على الكلمات الجميلة

تحياتى

واحد من البلد دى يقول...

حسبي الله ونعم الوكيل
شكرا على التعليق الجميل ده
نورتينى
سلامى ليكى

واحد من البلد دى يقول...

Sally
دايما منورانى
و تعليقك دايما يخجلنى
بجد شكرا جدا
على متابعتك لمدونتى
سلامى ليكى

واحد من البلد دى يقول...

بنت مصرية
شكرا يا عسل
على التعليق الجميل ده و الدعوه
بالنسبة للدستور يا مسهل
بس اشمعنى الدستور
سلامى ليكى

واحد من البلد دى يقول...

تامر
فعلا كلامك صحيح
بس لازم نحاول نخليهم يستغنوا عن العادات دى
شكرا يا باشا على المتابعة
و تعليقاتك الجميله

Esraa Hamed يقول...

سكر !!!!!
ماعلينا

يعني هو في بعض الضوابط المفروض نلتزم بيها في حوارنا

مش لدرجة سكر يعني
و لا رأي حضرتك ايه !!!

صحفية روشة يقول...

هو انا اتاخرت عنك اوى كدة
عالعموم كنت بس عاوزة اقولك انها كانت اظرف تدوينه
خلتنى ابتسم واتمتعت بقرائتها
__________________________________
ميفوتكش البوست الجديد (شيوخ على ما تفرج)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

Wael يقول...

خطييييييييييرة موت

تحفة بجد , انت موهبة يبنى خسارة فى البلد

الموسيقى فى غاية الروعة

دايما باستمتع بالزيارة هنا

very very gooooood

afendi يقول...

حللللللللللللللللللللللوه كتير والله حقيقي مصر ولادة تسلم و ربنا يخليك

afendi يقول...

الحقيقة لسى مكتشف البلوق بس حرابط هنا دى كلام جميل واصل يا عم و اتحفنا

maxbeta3zaman يقول...

هذه قصيدة تذكرنى بشعر بيرم التونسى ووصفه لتفاصيل حياتنا الشعبية ...
هو انت يا "واحد" بتاع الشادر الانتخابى ؟؟؟
والا الجدع المصرى النايم ده قريبك ..أنا فاكر انى قرأته عندك أو عنده ان لم تخنى "الزهايمر"