نام يا مصرى مصر مش عايزة تناديك
ياللى فقر الدنيا أصبح لك شريك
ياللى كان دائك وفائك والكرامة وكبريائك
الحشيش والبانجو ساقك.كبريائك مات خلاص البركة فيك
نام يا مصرى مصر مش عايزة تناديك
ياللى دايما كنت رافع بالسلاح أيدك لفوق
بالبنادق والمدافع خليت العالم يفوق
النهاردة سهل جدا تحكمك حتة حشيش
الشيوخ فوق مالطة تدن والشباب مابيختشيش
رقصة بلدى ورقصة تانجو
مرة خمرة ومرة بانجو
واللى م الدوامة ينجو يربى دقنه ويعاديك
نام يا مصرى مصر مش عايزة تناديك
فصلوا دستور مقاسهم يلبسوه بس الكبار
وأنت تحت نعال مداسهم قلت أه زى الحمار
قلت أه ولا حد همك مين يدوس فوق وش مين
هما يقروا الفاتحة وأنت كل حرف تقول أمين
أنت عارف بس صامت
حتى بطنك لما صامت
كان حزامك فوقها قامط للزراير يشتكيك
نام يا مصرى مصر مش عايزة تناديك
مين بيفهم فى السياسة؟لا الافندى ولا المدام
المهم الماتش إمتى؟والنتيجة كام لكام؟
والعشا فين النهاردة وفى المسلسل عملوا إيه
ولعيب الكورة الفلانى ساب ناديه فى الدورى ليه؟
كله بيهلوس وهايص
وإنت يا أبن المصرى لايص
جوه مسرح العرايس
والخيوط رابطة فى إيديك
نام يا مصرى مصر مش عايزة تناديك
كنت لما تقول معارض ألف واحد كان يخاف
بعت صوتك فى المعارض وأستغطيت باللحاف
قول نعم.حط العلامة .وأوعى تقرا فى يوم كتاب
هما عايزينك نعامة دافنة راسها فى التراب
والطاووس جنبك يخطى
بصمجى.ويقول دا خطى
وإنت لما رضيت توطى
شوف بقى اللى ح يجرا فيك
نام يا مصرى مصر مش عايزة تناديك
ياللى عايش ع الحضارة وكام هرم على معبدين
يا ابنى دول حبة حجارة إنت فين والناس دى فين
إنت جدك يعنى خوفو و الا خالك أخناتون
دا انت مابتعرفش تعمل حتى سوستة بنطلون
روح ل(ينى)إملا الإزازة والحياة أخر لزازة
دا انت يا ابنى مالكش عازة زى فرخة ناقصها ديك
نام يا مصرى مصر مش عايزة تناديك
ويقولولك مصر أكتر حد راعى للسلام
وإحنا زى حمار فى كارو عربجيها العم سام
اللى بيفكر يخالفه أو يقوله حتى ليه؟
تبقى ليلة أمه كحلى والمعونة تضيع يا بيه
إمشى تحت أوامره بس مرة (شى)أو مرة(هس)
وإن طلعلك مرة حس يبدأ التفتيش عليك
نام يا مصرى مصر مش عايزة تناديك
شفت واحد مرة قالى يا ابنى ماتبطل عويل
إنت ناسى نجيب بتاعنا والنوبل وأحمد زويل
قلتله الأول أخدها بقصة ساء فيها لديانته
وعمك أحمد إيه عملك لما جاب للثانية فمتو
والنبى إتخيب بخيبتك ياللى مش عارف نصيبتك
دا انت من صغرك لشيبتك لقمتك دى خسارة فيك
نام يا مصرى مصر مش عايزة تناديك
والنبى انا باكتب قصيدتى ودمعة نازلة من عيونى
أصلى مصرى وكل خيبتى إن أهلى علمونى
إنى لو شفت الحقيقة فى مرة وأسكت أبقى شوشو
وإن قدرك لو يجيلك قولى مين عنك يحوشو
ياللى مستغرب لحالى قوللى بالله يا ابن خالى
لما سيد يبقى سالى طب منين الخير يجيك
نام يا مصرى مصر مش عايزة تناديك
.jpg)
36 قول رأيك:
لا بجد الحتة الكمالة
جامدة جدا برضوا
عقبال
القصيدة اللى جايه
جامده جداااااا
من اولها لاخرها
شغل ممتاز
ومتفاءل بالقصيده اللى جايه هاتكون اجمل
very goooood (:
وائل.متشكر جدا على مجاملتك..وأتمنى التواصل دائما معك...بشرط...أن تتحفنى أنت الأخر بقصائدك الجميلة..مع أرق تحياتى
مبروك ع المدونة .. بالتوفيق
كلامك قوي وبيمس أمور كتير
فكرتني ببيرم التونسي وصلاح جاهين
في انتظار المزيد
خالص تحياتي
ههههههههههههههههههههه
صحيح (شر البلية .. مايضحك)
:)
انا بعت القصيدة للدكتور يامن مختار ومدونته هي "صناعة الانسان" مش حسيبه ان شاء الله لحد ما يلحنها لأنها حقيقي حقيقي من أروع ما قرأت والله
تحياتي
الأخ ياسر حسين .ربنا يكرمك يا عمنا...بيرم التونسى إيه وصلاح جاهين مين....الإتنين دول بالذات لو كحوا ....حينزلوا مليون (واحد من البلد دى)...تقديرى البالغ لك لمرورك لمدونتى.
ناجى العلى..والله إسمك ده عزيز جدا على قلبى...وبعدين هى دى سمة الشعب المصرى ..يعتصر أحزانه حتى يستخرج بسمة_ولو ساخرة_أما بالنسبة لى فأنا لا أستطيع أن أكتب أى زجل إلا لو كان ساخرا....والله العظيم غصب عنى...تحياتى لك.
حبيب قلبى...أشروووف..أنا تاعبك معايا جدا..والله أنا ما أستاهل كل ده...كفاية مرورك عليا.نورلى روحى وقلبى.خلانى شفت بعنيا.أنا مش لوحدى فى غلبى...هههههههههه.برضه مش قادر أكتب رد عادى..سامحنى..بالغ إحترامى.....على فكرة.أنا جميع المدونات اللى دخلتها عن طريقك.نوهت لأصحابها بكده..ويا ريت يكون التقليد ده متبع عند الجميع.أرق تحياتى
الكلمات جامدة
بس المصرى بدا يفوق
ربنا مع كل المصريين
ها يا جدعان
لحنتوهالى ولا لسه؟؟؟
الحقونى قبل ما تجيلى لطشة برد تقفلى زورى
أو يجيلى اسبهلال من اللى بيحصل واتشل وبقى يتعوج
----
مبروك الحته الجامده دى يا معلم
اللى هى المدونه
ومستنيين الكماله
البوستات الجايه قصدى
:P
Desert cat.أقولك حاجة صريحة..أولا علشان ما اكونش قليل الذوق.مشكور جدا مرورك الكريم للمدونة..نورتها بجد....بس والله إحنا ما بنفوق غير على بعض...وعموما.نتمنى الفوقة الكبيرة....الفوقة الكبيرة يا عمى والعالم كتيرة..........هههههههههههه
وينك يا وينكى..صباح شريف عفيف نضيف ظريف لطيف.......رغيف..ههههههه.إبقى شوفى بقى القصيدة بتاعة الإضراب...وينكى فى مدونتى يا جدعان..هيييييييييييييييه
امممممممممم
ايه الانهزاميه دى انت طلعت الشعب كله حشاش ومبانجو لا يا سيدى مليش فيه
شكرا ومش هسميك غير انهزامى ههههههههههه خخخخخخخخخخخخخخ
نورتنى فى الكوكب
والله ياست Appy أنا لا إنهزامى ولا حاجة ولكن هل ترين أى واقع غير الذى أراه...وعموما أنا كاتب ساخر ولن أكون غير ذلك.....وما يصحش أبدا فى أول دخول ليكى تمنحينى لقب (إنهزامى)مع تحياتى البالغة وتقديرى لمرورك الكريم
ايه يابنى
بعد كده هاتخلونى امضي على التيشيرتات
اه انا جيت.. مدونتك لذيذه
اى خدمات
عزيزتى..وينكى..والله إنتى بتخجلينى بمرورك المستمر..وأشكرك على رأيك فى المدونة...ومستنى رأيك فى البوست التانى(عم إبراهيم)وده على فكرة عن الإضراب...مع تحياتى
مش بقولك بتفكرني بصلاح جاهين
بجد بجد
مش عارفة اقولك ايه الكلام مش هيعطيك حقك
فوق فوق فوق الممتااااااااز
ربنا يوفقك
تحياتي
رودي
يا جماعه طيب واحد هيلحنها والتانى الفها والتانية هتغنيها طب انا جاية هنا اعمل ايه اقولكوا ممكن اجى اصقف
بس بصراحه بجد بجد اشعار تحفهههههههههههههههههه
انته المفروض تعمل ديوان يالله بقي بس ابقي قابلني لو حد جه اشتراه هيه هما كفاية عليهم يجيبوا عمارة يعقوبيان بتاعة علاء الاسوانى اصلها مشهورة وبيقولوا اللي قراها يبقي مصقف ماهي اصلها موضه .
وعجبي
يوميات موظفة استهبال " استقبال "
عزيزتى بنوتة مصرية..والله إنتى مجاملة زيادة عن اللزوم...صلاح جاهين ده مدرسة كبيرة ويا ريت أكون أنا من تلاميذها...أشكرك جدا على تعليقك المفعم بالذوق (أنا عارف إن المفعم دى ما تليقش على أشعارى)ههههههههههههه
الغالية فراشة..واحد يلحنها والتانى يغنيها وأنا كاتبها...بس ده كله مالوش أى قيمة من غير ودن جميلة زى حضرتك تسمعها...وبالنسبة للديوان أنا كفاية عليا أكتب بيت واحد بس ....وأنا متأكد إن بقية القصيدة حتكون فى ؟؟؟؟؟؟؟؟؟؟؟؟؟؟كفاية كده...يجعل كلامنا خفيف عليهم...شكرا على التعليق
والله انا جيت اعلق هنا مكنش راضى يحفظ التعليق يظهر كان عندى مشكله فى النت
بس اللى كنت عاوزة اقوله ان البوست ده ولا اروع
عشان كدة اسمحلى اخده كوبى واسجله عندى
بجد استاذ
صحفية روشة..البوست وصاحبه تحت أمرك..إتفضلى
لااااااااااا
انت جامد جدا فى تقسيمك للكلام واللحن واختيار الكلام المناسب بجد تدوينة تحفة من بتوع النهارده مش من بتوع خوفو زمان
دى احلى قصيدة سمعتها ساخرة فى تدوينة لحد دلوقتى وحاول تنشرها اكتر جميلة جدا جدا من غير مجاملة كويس انك جيت عندى والطشت فى مدونتك كمل كل تدويناتك حلوة
سلالالام
رصيف نمرة خمسة..أشكرك على المجاملة..وأوعدك بدوام التواصل...دمت صديقا
بسم الله ما شاء الله
جميلة جداااااااااااا
تسلم ايدك
:: سالى ::
سالى
مشكورة على الزيارة والتعليق..نورتينى بجد
الف مبروك البوست ده دخل السحب
وفاز بغساله
اقصد هيتنشر فى مدونة لوحه شرف
ادخل عندى وانت تفهم ايه الحوار ده
صحفية روشة..أنا دخلت لوحة الشرف دى من زماااااان..من أول ما كتبتى عندى أول تعليق ..تحياتى ليكى
جميل جدا احييك
انا متزكلر انى سمعت الشعر ده قبل كده
بس بصراحه مش متزكر مين اللى كان بيقولو
بيتهيألى الابنودى والله اعلم بس احييك فعلا اخوك احمد
معلش يا خالى ارد برضوا لو سمحت
على الاخ احمد
ـــــــــــــــــــــــــــــــ
القصيدة دى يا ابو حميد اتكتبت مخصوص عشان البلوج بتاعى يعنى قصيدة عمولة
و طبعا الابنودى عمنا لكن
اللى كاتبها صاحب المدونة دى
و برضوا مسجلة (حق التأليف) و هو و الله مش محتاج يكتب حاجة كان كاتبها حد قبل كده
لانه عندة الالاف القصايد اللى هو كاتبها
و كلها مسجلة
و الجديد يتم تسجيلة قبل نزولة على المدونة
زى القصيدة دى و القصائد التانية
اللى فى المدونة
تحياتى ليك
انا بقول انى الكلام دة جميل جداااااااا وبيعبر عن الموجود عند كل مصرى وربنا يسهل فى الجاى زندن البحيرة
الأخ/أحمد....على قد ما تعليقك أغضبنى لأتهامى بالأقتباس..لكنه أسعدنى جدا...لأنك شبهت ما أكتبه بما يكتبه الأستاذ العظيم(عبد الرحمن الأبنودى)..فعلى قدر ما أعتبرت إتهامك إهانة لى على قدر ما أتخذت من تشبيهك وساما على صدرى...أوعدك ..مش بس بقصيدة ...لا...بقصيدتين فى حب مصر تانى....وأبقى أشوف بقى ..قرأتهم فين المرة دى.....
انا اول ما شفت اللى انت كاتبه افتكرت بيرم التونسى وصلاح جيهان والحاجات الحلوة دى مع انى مش متابعه قوى الزجل لاكن من النهاردة هتابع اللى انت بتكتبه ربنا يكرمك يارب وزى ما كل واحد له رساله انت كمان رسالتك هيا كتباتاك دى وزجلك ويارب توصل بيها لقلوب الناس وعقولها ونتغير بقه ... اسماء ستيت
انا ع فكرة بكتب شعر انجليش وقصص قصيرة وساعات شعر عربى يمكن لان الانجليش مش ملتزم بالقافية قوى انما العبى ساعات موضوع القافية دى بيدوخنى :)
انا لقيت القصيده دى على بلوج الفاجومى و انا بدورله على اى حاجه سواء جديده او قديمة
المهم انى اتعكبلت فيها و مش عاوز اقولك قد ايه انى انبسط انى لقيت لقيتها و قريتها لانها فعلا تستاهل القرايه
احيـــــــك
إرسال تعليق