الخميس، 2 أكتوبر، 2008

كل سنة و انتو ....طيبين..؟؟؟


كل ســنة و انـتـو طيــبـيــن

وانا نـايـم..وانـتـم نـايــميــن

يغـلى الحـديد..يـتـباع الغــاز

عقبال كمان ما يبيعوا الطين

وكل سـنة و انـتـو طيـبـيـن

وكل سـنة و احـنـا عــروبة

نعـمـل قمـمنـا المضـروبـة


تصحى الصحافة اللـهـلوبـة

على..إننا نشـجب و نـديـن

وكل سـنة و انـتـو طيـبـيـن

وكل سـنة و احـنـا حبايـب

حاكم لئـيـم...محكـوم خايب

يلاعـبنا( بوكر) أو( شايـب)

ونروح شمال و نقول دا يمين

وكـل ســنة و انـتـو طـيـبـيـن

عـقـبـال ما نكـبر و نكـحـكـح

ونـشـوف ولاد أولاد (لـكـح)

بـفـلوس جدودهـا بتـتـمرجح

فوق برج(بيزا)ونهر(السين)

وكـل ســنة و انـتـو طيـبـيـن

وكـل ســنة و احـنـا نبـيــنـا

بـيـتـشـتـم مـن أعــاديــنـــا

وساعات كمان منـنـا فـيـنـا

من ناس ما عندها ذرة دين

وكـل سـنة و انـتـو طيـبـيـن

وكل سنة ييجى (ابو مازن)

يـبحث...يـفاوض...و يـوازن

مع ( قـيـنـقاع )و الا (هوازن)

والأقصى يصرخ فى فلسطين

وكـل ســنة و انـتـو طيـبــيـن

وكـل ســنـة يـطـلـع لـنــا داء

إيشى نانسى عجرم وايشى هيفاء

وان مــرة قــال الــعـيـــل واء

تكـون أكـيد من صنع الصـين

وكـل ســنـة و انـتـو طيـبـيـن

وكـل سـنـة و الشــيـخ ويـكـا

يـفـتـيـلـنـا بـكـلام فـابـريـكـا

يــقــول عــدوك أمــريـكـــا

والبوس حلال لو ع الخدين

وكـل سـنـة و انتـو طيـبـيـن

يا اسيادنا حابس أو دسـتـور

ليدوس على النملة مداس طور

وعيش عبيط ح تموت مسـتور

وسـلام بقى واشـوفكـم بـعـديـن

وكـل ســنـة و انـتـو طيـبــيــن

76 قول رأيك:

فارس بلا جواد يقول...

جميلة بجد تسلم ايدك
كلام واقعي ومؤثر ودمه خفيف كمان
اسلوب ساخر يناقش أكثر من مشكلة في واقعنا المؤسف
ومن الناحية الأدبية كلماتك كانت رشيقة والاوزان مميزة بس شايف ان البيت الوحيد اللي كان الوزن بتاعه تقيل علي اذني هو البيت اللي بين كل المقاطع
وكـل ســنـة و انـتـو طيـبــيــن

وزنه مش نفس وزن باقي الابيات
لكن عموما كلماتك جميلة وحضرتك فعلا شخص موهوب
كل عام وانت بخير

Gannah يقول...

والله يا سيدى لقد فتحت كل الجروح وجعلتنا نصحو على الواقع الأليم
وان كنا لا ننسى
كل سنة واحنا طيبين ويارب العيد القادم يكون حال مصر وحال الأمة أفضل
تحياتى

سنووايت يقول...

كل سنة وحضرتك طيب وبخير
القصيدة عرضت كل الوقائع المؤسفة اللي بتحصل باسلوب ساخر كعادتك
فعلا جميلة
يارب يكون العيد القادم احسن مع ان الاوضاع بتزداد سوء من سنة للتانية

كيارا يقول...

ياااااااااااااااااه

انت جبت كل اللي بنعاني منه واتكيت عليه

كل سنه وانت طيب

الفارس الملثم يقول...

ايه يا عم الابداع ده كله , بجد قصيده اكثر من رائعه , بجد انت ما تقلش مستوي في الشعر العامي عن اي حد حد من مشاهير الشعر العامي ويبدو ان غيابك جعل موهبتك تزداد صقل وليس العكس

طبعا كلامك بيلمس علي اوجاع الامه وما اكثرها

ياريت ماتحرمناش من نزف ابداعك ده باستمرار

تحياتي وتقديري

MaherAlshial يقول...

طبعا أنا ماتأخرتش عليك وجيت بسرعة زي ما وعدتك ، بالنسبة بقى للقصيدة يا صاحبي والله العظيم ما أنا عايز أجاملك بس جميلة جدا ،وعلشان كده أنا هأناقشها بشكل موضوعي
كل سنة واحنا حبايـب
حاكم لئيم محكوم خايب
أدق وصف لشعبنا العظيم أنه يقاوم لؤم الحاكم بخيابة منقطعة النظير ، بس عايز أقولك حاجة مش عارف ليه حاسس إنها قربت أأقصد نهاية اللئيم ،يمكن مش إحساس بقدر ماهي أمنية ، بس في أمل إن معدل الخيابة يقل شوية ،شكلها برضة أمنية ،ربنا يدينا ويديك طولة العمر.
ماهر

¨¨¨°~*§¦§ Appyplanet §¦§*~°¨¨¨ يقول...

سرقوا العيد من مصر مش عارفه ليه انا مش لاقياه والله
بس برضه كل سنه وانت طيب

موناليزا يقول...

حقا سخرية مبكية وتوجع القلب
كل سنة وانت طيب ويارب احوالنا تبقى احسن من كده بكتير

عاليا حليم يقول...

كلماتك فكرتنى بمقولة جدتى

كله بيغلى الا البنى ادم حيفضل رخيص

-----------

كل سنة و انت طيب

واحد من البلد دى يقول...

الصديق
فارس بلا جواد

مشكور لك مرورك أخى الكريم
وقد اصبت فى اختيار كلمات تعليقك
وبالنسبة لموضوع(كل سنة و انتو طيبين)
فهى موزونة جيدا و تتناسب مع باقى القصيدة و لكنى اقولها للمرة الألف إن أكثر ما قد يواجه شعراء العامية مثلى هو قراءة بعض الناس لقصائدهم بطريقة تتعارض مع ما يقصده الشاعر..
فأنك قرئتها مثلا-وهو الراجح-(كل سنة وأنتم طيبين)وليس(كل سنة و انتو طيبين)
بالطريقة العامية التى يمكن لأى أحد أن ينطقها..

يسعدنى جدا تواصلك و دوام مناقشتك معى

دمت بخير
~~~~~~~~~~~~~~~~~~~~~~~~~~~~~~
الأخت الغالية

جنة

سلمتى أختاه من الجروح و أتمنى أن يكون الحال أفضل..
ليس العام القادم..
ولكن لنكن منصفين و نعطى الحكومة فرصة كافية..
أعنى...فلنجعلها(القرن القادم)-ربما بالتوقيت الضوئى..

دمتى بكل خير
~~~~~~~~~~~~~~~~~~~~~~~
الأخت الغالية

سنو وايت

وحضرتك بكل صحة و عافية
وأتمنى مثل ما تمنيتى من إصلاح الحال و ذلك حرصا على مستقبل أحفاد أحفاد أحفادى..

دمتى بكل خير
~~~~~~~~~~~~~~~~~~~~~~~
الزائرة الجديدة

كيارا

أحيانا لابد أن نضغط على الجرح حتى نوقف النزيف.

كل عام و حضرتك بخير

أتمنى تكرار الزيارة
~~~~~~~~~~~~~~~~~~~~~~~~~~
الأخ الغالى على قلبى

الفارس الملثم

يا باشا أنا من أصاغر من يكتبون العامية

وموضوع الموهبة ده وصقلها..ده لأنى باكتب من 23 سنة تقريبا..
يعنى لو موهبتى لم تصقل فى السن ده حتصقل إمتى..؟؟ فى الآخرة يعنى؟؟؟
هههههههههه
بس البيت و الأولاد بقى..
ربنا يوعدك ونبقى نشوف بقى موهبتك حيجرالها إيه..
هههههههه

دمت بخير يا صديقى

~~~~~~~~~~~~~~~~~~~~~~~~
الزائرالجديد
MaherAlshial

شكرا لقبولك الدعوة

وربنا يحقق أملك فى زوال الخيانة التى أصبحت كالدم فى العروق..

شرفتنى جدا بالزيارة

أرجو تكرارها

~~~~~~~~~~~~~~~~~~~~
الأخت الغالية

آبى هانم

إحنا لو قطعنا إيدين اللى سرقوا العيد مننا ....ممكن نتاجر فى الكفوف المستعملة..

وبرضه ..كل سنة و انتى طيبة

~~~~~~~~~~~~~~~~~~~~~~~
الأخت الغالية

موناليزا

أنا لا أقصد بقصيدتى إيلام قلوبكم

ولكن لا أريد أن نفرح بتلك المسكنات اللتى تنسينا الألم لفترة وجيزة سرعان ما نشعر بعدها بألم أكبر من ذى قبل

دمتى زائرتى بخير

وكل عام وحضرتك طيبة

~~~~~~~~~~~~~~~~~~~~~~~~
الأخت الغالية

عاليا حليم

قال تعالى
(ولقد كرمنا بنى آدم و حملناهم فى البر و البحر و فضلناهم على كثير ممن خلقنا تفضيلا)

ثم قال جل شأنه

(ظهر الفساد فى البر و البحر بما كسبت أيدى الناس)

الإنسان صديقتى ليس رخيصا بالفطرة و لكنه هو من يحدد الثمن..
بأخلاقه و مبادئه و إيمانه

وإبقى إسألى جدة حضرتك على أمثال ثانية
ههههههههههههه

دمتى بكل خير

وكل سنة و حضرتك طيبة

بنت سيناء.. يقول...

مدونة رائعة بجد .ان شا الله موجودة دايما

وكل سنة وانتم طيبيييييييييين

قلب شاعره يقول...

ههههه وانت طيب على كل الاحوال
خلى بالك من نفسك ...

NoNa يقول...

كل سنه وانت طيب
جميل التوبيك لكنه يوجع القلب :( بس دى الحقيقة فعلا
حمد لله على سلامه :)

شكرا انك نورت مدونه بتاعتى ربنا يخليك

ياترى اخبار اسلام ايه ؟ بقلى فتره مش بشوفه ع ميل يارت تبلغه سلامى قله كل سنه وهو طيب

الجواز و سنينه يقول...

كل سنه و انت طيب
و بعد الكلام ده مش هاقدر انام و انتم نايمين لازم حد يكون احى يمكن يعرف يقلق الباقيين
و فاضل انا من الصاحيين
اروح انام بقى
كفايه سهر لغايه كده

عاشقه الفردوس يقول...

لا اله الا الله

ليه كدا

كله مره واحده كدا

كل سنه وانت طيب وعيد مبارك عليك

mahasen saber يقول...

كل سنه وانتا بالف خير وسلام...
وبرغم كل الطحن والغلا والاسعار
والجنون من فتاوى التقاليع لكل ما فى المجتمع من بلاوى...
عيد سعيد عليك
وعلى اسرتك
وعلى كل من تحب...
وكل سنه وانتا واحد من البلد دى وواحد فعال كده دايما
كل سنه وانتا بالف خير وصحه وستر...
عيد سعيد ومبارك عليك...

بنت مصريه يقول...

لا استطيع فعل شىء سوى التسفيق
تسلم ايدك والله فعلا الواحد السنه دى مش حاسس ان فيه عيد خالص
حاجه تغم والله
احييك عالقصيده الهايله وبقولك كل سنه وانت بالف صحه وسلامه



اه على فكره انا عارفه الشيخ ابو فتاوى فبريكا دا هههههههههههههههههههه

فارس بلا جواد يقول...

أستاذنا الفاضل
أعتذر إذا كنت مصر علي رأيي في هذا البيت .. البيت فعلا غير موزون وانا لا احب مبدأ المجاملة أو تكبير الدماغ

(إن أكثر ما قد يواجه شعراء العامية مثلى هو قراءة بعض الناس لقصائدهم بطريقة تتعارض مع ما يقصده الشاعر)

أخي العزيز أنا أعلم هذا جيدا وأنا بالفعل قرأتها بجميع الطرق الممكنة من الشمال لليمين ومن فوق لتحت .. وبالمناسبة أنا لست هاوي أو ساذج لأقرأ الشعر بطريقة خاطئة
من يقرأ الشطر الاخير من كل مقطع سيجد هذا الكسر الواضح في الوزن

عقبال كمان ما يبيعوا الطين
على..إننا نشـجب و نـديـن
ونروح شمال و نقول دا يمين
وكـل ســنـة و انـتـو طيـبــيــن

المشكله يا أخي العزيز ليست في انتو و انتم كما ذكرت .. ولكن المشكلة في كلمة طيبين فهي السبب في الكسر وذلك لأن الكلمة مشددة (طيّبين)
في حين أنك لو حاولت ان تضع كلمة أخري بدلا منها ستجد ان الوزن استقام مثل (نايمين أو ساكتين) او أي كلمة تراها مناسبة دون أن تكون مشددة
أعتذر لك وأعلم ان الموضوع بسيط بالفعل وهو اختلاف علي حرف ولا يستدعي كل هذا النقاش ولكن أحيانا يكون الخطأ صغير ولكن الأصرار عليه يجعله أكبر
أسف مرة أخري إن كان رأيي أزعجك .. وإن كنت لا تريد الالتفات لتعليقي فهذا من حقك
كل عام وانت بخير

engy يقول...

كلامك بجد جميل
وبيفكرنا بما نحاول ان نتناساه
او كاننا مش واخدين بالنا
اشكرك

asmaa يقول...

بجد انت اسلوبك رائع بتعرف تصيغ الدنيا حوالينا فى قصيدة بتاثر فينا قوى وزى ما كل مسلم المفروض عليه انه يقف على ثغرة من ثغرات الاسلام فانت بجد خير امين على الثغرة اللى انت واقف بتحارب من عليها بقلمك وبتدينك وبعلمك

ربنا يكرمك واشعارك دى توصل لكل الناس وتكون بداية فوقان شعب للاسف نام من بدرى بس الامل موجود انه يقوم تانى بايدنا وبلسانا وبعقلنا وعلمنا وبقربنا من ربنا وتوكلنا عليه بجد بجد هنقوم تانى ونبقى البيرونى وابن الهيثم والحسن البصرى وهيطلع مننا خالد ابن الوليد وسيدنا عمر رضى الله عنه وابو بكر رضى الله عنه ومحمد الفاتح بجد ربنا يفتح علينا جميعا ويوقف كل واحد واقف على ثغرة من ثغرات هذا الدين بيحمى ويدافع عنه دينا وعن عروبتنا وعن بلدنا وعن شعبنا


جزاكم الله خيرا يااخى وبجد نورت مدونتى التواضعة

عاشقه الاقصى يقول...

ماشاء الله بجد

رائعه

واحنا فعلا حالنا صعب اوى

mahasen saber يقول...

انا جيت تانى وقريت القصيده مره كمان
وده شئ اسعدنى بس عشان حضرتك
تصدقانى جيت...
انا اصلا مقدرش اتأخر عن واحد من البلددى ابدا...
كل سنه وانتا بالف خير وسلام وصحه وستر...

ميرو انتكة يقول...

السلام عليكم

بجد كلماتك حلوة قوى ومعبرة جدا وواقعية جدا جدا

كل سنة وانت طيب

تحياتى

ندا منير يقول...

دلوقتى فهمت معنى تعليقك اللى سبته عندى
واتبسطت كتير لما لقيت واحد قلبه كدة على اللى بيحصل
ومهتم بكل حاجة
ومش قادر يتبسط عشان غيره مش مبسوطين
محدش كدة دلوقتى
بجد ربنا يكرمك
وكل سنة وانت طيب

فليعد للدين مجده يقول...

أبيات جميلةومعبرة لكن بالطبع لي تحفظ علي (تعيش عبيط تموت مستور)

لو (عيش مستقيم تموت مستور) يبقي أحسن

دمت مبدعا

Zianour يقول...

الاخ الكريم
اولا تسلم ايدك بجد على الزجل الجميل اللي لخص الوضع القائم من جميع الجوانب

ثانيا بقى كل عام وانت بالف خير انت والاسرة الكريمة

ثالثا اتمنى ان تكون نبرة الاكتئاب ف تعليقك قد انتهت باذن الله

تحياتي ولا تغيب عننا

دمت مبدعا
زيانور

Miss. Sosa يقول...

عيش عبيط حتموت مستور

هو ده الكلام المظبوط

هههه

هو مش عبط يااستاذ هو عجز بعيد عنك لان اغلبنا مدرك لكن عاجز ومش قدامه غير انه يتفك بكلمتين مع اصحابه او علي صفحات مدونة او يدبدب ويرفص في الارض

دمت مبدعا

حسن محمد توفيق يقول...

الكل بيقولكم:

كل عام وانتم بخير

بس أنا مش هقول زى الكل ولكن هقول:

أنتم خير لكل عام

وأهديكم عطر الورد وألوانه

أرسل خطاب أنتم عنوانه

أهنيكم بقدوم عيد الفطر

وأيامه

والود ودى.. اجمع كل ورد العيد

وأكتب على كل وردة :

يارب أشوفك سعيد

tamer.sala7 يقول...

أول مشاركة وانشاء الله مش الاخيرة


بجد ابدعت وعجبني اوي وصفك لحالنا المتنيل علي عينه للأخر ربنا يعينك ويعيننا

دمت ناجحا انشاء الله وكل عام وانت بخير

أنا إنسان يقول...

وانت طيب
وهمه مسقطين
بثورة شعبيه سلميه كبرى

اهو ده عيبه يقول...

الله على كلامك
ولو انه بيلمس الجرح ويوجع قوى
بس هى دى الحقيقه للاسف
بجد تسلم ايدك
وكل سنة وانت طيب

Wael يقول...

فى الجوووووون

ومع ذلك , كل سنة وانتو طيبيييين (:

غير معرف يقول...

قصيدة عامية
فكرتنى بايام زماااااان
كل عام وانت بخير
كل عام ونحن بخير
والى الامام دائما
عماد مصرىىىىىىىىىىىىى

حبيبـــــــة القمـــــر يقول...

رغم انى بهنى الكل بالعيد
وكتير هنونى بالعيد
لكن حقيقي مش حاسه بالعيد خالص
وكأنه يوم زي باقي الايام
بس كان اجازة مش اكتر
خلينا نستنى العيد الجاى
يمكن يكون افضل

شهد الكلمات يقول...

وكـل سـنـة و الشــيـخ ويـكـا

يـفـتـيـلـنـا بـكـلام فـابـريـكـا

يــقــول عــدوك أمــريـكـــا

والبوس حلال لو ع الخدين

عجبني جدا الجزء ده
دمه خفيف
و طبعا القصيدة كلها مشطشطة و ربنا يستر عليك

احيك علي احساسك العالي و كلماتك القوية الجريئة

و برغم كل اللي قولته
برده كل سنةو انت طيب

تحياتي

rovy يقول...

يااااااااه يا اخى لم تترك جرحا الا و فتحته ..

اسأل الرحمن ان يعيننا على ما ابتلانا و ان يأتى العيد القادم و قد تحسنت احوالنا و لو قليلا .. تفتكر الحلم ده بعيد ؟؟

على كل حال .. كل سنه و انت طيب و مبدع و عنا ما تتغيب ..

كل سنه و احنا لسه بنحاول نكون موجودين رغم الالام و رغم القسوه و رغم الانين و نفضل برضه احنا و انت طيبيين ..

ابدعت و دعواتى لك دائما اخى الفاضل ان يديم الرحمن لك ابداعك و ان ييسر لك الامور لتظل دائما متواجدا بيننا و مبدعا و شاعرا شاعر بنا .

تحياتى

قلب مصرى يقول...

هايل
القصيدة هايلة والله
وكل سنة وانتو طيبين

shaimaa samir يقول...

احم
وحضرتك طيب

بسبوسة بالسم
عارف الاحساس ده
كلام جميل
بيووووووووووجع


شكرا لك

مجداوية يقول...

السلام عليكم
أخيرااااااااااا لقيت حد شايف نفس الصورة اللى أنا شايفاها وبتقطع فى قلبى

عندك حق أخى الكريم انك متقدرش تفرح لكن بتبقى فرحة واحدة ونعمة كبيرة جدا انك وسط كل هذا اللون الخروبى انك مسلم ونعمة الاسلام والايمان لا تضاهيها نعمة وحقيقى فهى كافية رغم كل هذا فوالله أنا أشفق وأحزن على غير المسام ومن لا يعبد الله وفى نفس الوقت أحمد الله أن أنعم على بالاسلام
احساسك بالهم من كل هذا يؤكد أنك ما زلت حى وفى الحياة أمل وفى الاسلام الحل والأمل ولكن هل تسمع الموتى ؟؟؟ هذه هى المشكلة
والله المستعان واليه ترجع الأمور
ولكن يبقى أن قلمك أجاد التعبير ومس القلب وهذا هو الجمال وسط كل القبح الذى عبرت عنه

mohamed ghalia يقول...

كل سنة وحضرتك بخير
حاول تنسى النكد ده لغاية العيد ميعدى
تقبل تحياتى وإعجابى بالمدونة

Esraa Hamed يقول...

البوست تححححححححفة بجد
و الكلام للأسف كله واقعي
بس هرجع و اقول
ان الله لا يغير ما بقوم حتي يغيروا ما بأنفسهم

لازم كل واحد فينا يبدأ بنفسه ميستناش الناس و لا البلد و لا الحكومة اللي تصلح
احنا اللي لازم نبدأ

ياللا ع العموم كل سنة و حضرتك طيب بردو

تحياتي

واحد من البلد دى يقول...

الزائرة الجديدة

بنت سيناء

مشكور لكى مرورك و تعليقك و أرجو تكرار الزيارة

واحد من البلد دى يقول...

الزائرة الجديدة

قلب شاعرة

مرحبا بكى دائما

و اخلى بالى من نفسى...؟؟؟؟

هو انتو ناويين تسيبونى لو رحت الأوبرج و الا حاجة..؟؟

هههههههههههههه

ولا يهمك

دمتى بخير

واحد من البلد دى يقول...

الصديقة الغالية

نونا

سلامك وصل لإسلام..
وما تبقيش تغيبى عننا كده

تعليق حضرتك بينور المدونة

دمتى طيبة

واحد من البلد دى يقول...

الزائرة الغالية

الجواز و سنينه

يعنى بعد ما قريت تعليقك و فكرت إنك الوحيدة اللى صاحية..
تقوليلى كفاية كده و اروح انام..

عموما..
أحلاما ..سعيييييييييييدة
علشان انا حاسس إن النومة حتطول..

دمتى طيبة

ابقى كررى الزيارة

واحد من البلد دى يقول...

الزائرة الكريمة

عاشقة الفردوس

محمد رسول الله

وبعدين لازم تقولى (عيد سعيد)

هو مبارك فى العيد كمان..؟؟؟

دمتى طيبة

واحد من البلد دى يقول...

الزائرة الكريمة

محاسن صابر

ادعو الله لكى بمثل ما قلتى
..ولكن بعد تعليق حضرتك الجميل ده..
كان كفاية(عيد سعيد)...
مش لازم (مبارك عليك)..

أقولك بقى..

مبارك عليكى انتى و على اللى يتشددلك..

ههههههههههههههههههههه

زيارة مشكورة
يارب دايما

واحد من البلد دى يقول...

الزائرة الجديدة

صاحبة اللقب الخفيف

ميرو انتكة

زيارة مشكورة و اتمنى تكرارها

كل عام و انتى بخير

واحد من البلد دى يقول...

الزائرة الكريمة

ندا منير

ربنا يكرمك على التعليق..

بس الموضوع و الله بقى زيادة آوى..

وكويس إن حضرتك برضه حاسة بيه..

عموما..

دمتى بخير

واحد من البلد دى يقول...

الصديقة الدائمة و الأخت الغالية

بنت مصرية

انتى فين يا أختنا العزيزة

تعليقك يشرفنى و بلاش تغيبى عننا تانى

كل عام و حضرتك بخير

واحد من البلد دى يقول...

الصديق الغالى

فارس بلا جواد

يا آخى..الإختلاف فى الوزن لا يفسد للشعر قضية..

كما انت مصر على رأيك أنا برضه مصر على رأيى..

ولكن تواصلى مع أصدقائى هو أهم عندى من كل القصائد..
وممكن لو حضرتك زعلان من موضوع الوزن ده..
انا ممكن امسح القصيدة كلها..

لأن زعلك عندى أهم من كل القصائد..
يا راجل..القصائد تتعوض..لكن الأصدقاء اللى زى حضرتك..

نلاقيهم فييييين..؟؟؟؟؟

دمت صديقى

واحد من البلد دى يقول...

صديقتنا الغالية

إنجى

انا عارف ان الناس عارفين و حاسين بكل حاجة..

لكن الواحد بيحاول يعمل مش واخد باله..

وبرضه ما بيعرفش..

دمتى صديقتى

واحد من البلد دى يقول...

الصديقة و الأخت الغالية

أسماء

تعليقك يا أختاه ينم عن وعى و ثقافة قويين..

ومن يحاربون مثلى كثيرون..
بل إننى أقلهم..

ولكن لا نستطيع أن نفعل سوى أن نجند موهبتنا أيا كانت فى توعية الناس أو على الأقل لنعلن بها للملأ أننا لسنا نائمين..

دمتى يقظة

واحد من البلد دى يقول...

الزائرة الكريمة

عاشقة الأقصى

ليس حالنا صعبا كبلد..
بقدر ما هو صعبا.....كأمة

دمتى بخير

واحد من البلد دى يقول...

الأخ الفاضل

فليعد للدين مجده

الكلمة محل إنتقادك آخى الكريم ليست نصيحة أقدمها للآخرين و ليست مبدئا شخصيا أطلب من القارئ أن يتخذه منهاجا له..

ولكنها تهكما على من يتخذها مبدئا له.
وأريد أن أقول أن من يتخذ هذه الكلمة نهجا يسير عليه هو السبب فيما آل إليه حالنا..

أرجو أن أكون أوضحت لحضرتك قصدى

دمت متواصلا

واحد من البلد دى يقول...

الأخت الكريمة

أم نور و زياد

تحياتى لشخصكى الكريم و لأولاد حضرتك
والأسرة جميعا..

هى ليست نبرة كآبة أختاه بقدر ما هى شعور بالواقع الذى أتمنى أن يتغير بإذن الله..

دمتى طيبة

واحد من البلد دى يقول...

الصديقة الجديدة

ميس سوسا

صدقتى ...هو عجز فعلا..

ولكن الحمد لله أننى من اللى بيتفك مع أصحابه بكلمتين..
لأنى لو من اللى بيرفصوا و يدبدبوا فى الأرض..كان زمان السقف وقع من سنييييين..
وابقى عايز حديد طبعا والحديد عند الحداد و الحداد عايز مسمار و المسمار عند النجار و النجار عايز بيضة والبيضة عند الفرخة و الفرخة عندها انفلوانزاو المصل عند الدكتور و الدكتور هاجج بره علشان مصر بلد ضارة..

ههههههههههههههههههههههه

كفاية كده عليكى

دمتى غير عاجزة

واحد من البلد دى يقول...

الأخ الفاضل

حسن محمد توفيق

تعليق حضرتك نسانى انا كاتب إيه أساسا..
ربنا يكرمك و يديم عليك نبرة التفاؤل التى اراها فى تعليقك..

دمت بكل خير

واحد من البلد دى يقول...

الزائر الجديد

تامر صلاح

انت عارف الصورة اللى انت حاططها دى..
انا من اشى المعجبين بهذا الفنان العفوى

ومش عارف إيه السر فى أختيارك للصورة دى بالذات..
عموما..

زيارتك أسعدتنى جدا..
ارجو تكرارها

دمت بخير

واحد من البلد دى يقول...

الزائر الجديد

أنا إنسان

انت حتودينى ورا السمس كده(السمس)..

ثورة إيه يا عم ..

ربنا يكفينا شر الثورة..

إحنا آخرنا (إضراب)

كرر الزيارة تانى بقى..

بس و النبى من غير ثورة.

تحياتى لك

واحد من البلد دى يقول...

الأخت الغالية

اهو ده عيبه

يعنى حضرتك ما تشرفنيش غير من السنة للسنة كده...

كل سنة و حضرتك طيبة (بجد)

ما تغبيش عننا تانى

دمتى بخير

واحد من البلد دى يقول...

أخويا و حبيبى

وائل

فينك يا عم..

المدونة ناقصة تعليقك يا استاذ..

انا عارف انك مشغول..
وانا كمان و الله علشان كده باعذرك..

بس ده ما يمنعشى من بصة صغيرة على اخوك ..واحد من البلد دى


تحياتى يا باشا

واحد من البلد دى يقول...

الأخ

غير معرف
عماد المصرى

كل عام و انت بخير

بس إيه حكاية للأمام دائما دى..؟؟؟

هو حضرتك بتمشى بظهرك..؟؟؟؟

دمت بخير

واحد من البلد دى يقول...

الأخت العالية

حبيبة القمر

أتمنى من الله مثل ما تمنيتى و لكن هل يمكن أن يجلس الجائع منتظرا مائدة تهبط عليه من السماء..

حاشانا أن نكون مثل من فعلوها..

دمتى بخير

واحد من البلد دى يقول...

الصديقة الغالية

شهد الكلمات

يا أختاه..
الشيخ و يكا ده معروف للناس كلها..

وانا اول من اطلقت عليه اللقب ده..

وربنا يستر علينا كلنا..

إنتى حتقلقينى لييييييييه...؟؟؟؟؟؟

هههههههههههههههههههه

دمتى متواصلة

واحد من البلد دى يقول...

الأخت الغالية و الصديقة الدائمة

روفى

والله يا أختاه تعليق حضرتك قصيدة لوحده..

أتمنى من الله أن يرزقنى من دعواتك ما دعوتى و أن يرزقكى مثلها..

آمين آمين

ولا أظن أن الحلم بعيدا و لكن المشكلة أختاه فى أنه (ما زال حلما)

دمتى بكل خير

واحد من البلد دى يقول...

الأخ الكريم

قلب مصرى

كل عام وانت بخير

هو حضرتك متأكد إن قلبك لسه مصرى..

مش صينى يعنى..

هههههههههههه

دمت بخير

واحد من البلد دى يقول...

الأخت الغالية

شيماء سمير

والله يا أخت الواحد مبقاش عارف إن كانت بسبوسة بالسم و الا سم بالبسبوسة..

دمتى بخير

واحد من البلد دى يقول...

الأخت الفاضلة

مجداوية

عودا حميدا أختاه

علقتى فأبلغتى

أشكرك جدا على كلماتك الرقيقة المعبرة و التى إن نمت عن شيئ إنما تنم عن إحساس رفيع و إيمان بالغ

أدام الله علينا جميعا نعمة الإيمان

و أفاض علينا من سابغ فضله

آمين

دمتى بكل خير

واحد من البلد دى يقول...

الصديق الجديد

محمد غالية

زيارة مشكورة

الظاهر كده إنى حاحاول أنسى النكد ده لغاية العمر ما يعدى..مش العيد بس

دمت صديقى

واحد من البلد دى يقول...

أختنا الصغيرة و صديقتنا الدائمة

إسراء حامد

والله يا إسراء أنا أغير ما بنفسى دائما و لكن للأسف ..
يبقى الوضع على ما هو عليه..
وما هو عليه عندنا ليست بمعنى الثبات.
لالالالالالالا..
ولكن بمعنى..(إلى الأسوأ)..

وبرضه..كل سنة و انتى طيبة..

ما تغيبيش علينا تانى.

وإبقى أعذرينى فى قلة الزيارات..

البيت و الشغل و الأولاد وحاجات كتيييرة..

دمتى بخير

ربع ضارب يقول...

جميلة جدا بس على قد مهى جميلة بس بتوجع اوى تسلم ايدك ويارب دايما تمتعنا

mahasen saber يقول...

ههههههههههه ضحكتنى ماشى وعلى اليى
يتشددلى كمان يعنى على عبدالرحمن ابنى
بحذك ده صعب المراس واليى يتصدرله هو الخسران...

عاليا حليم يقول...

فىين جديدك يا عزيزى ؟

وفاء بركات يقول...

بجد أكثر من رائعه..
أتمني لك التوفيق
وكل سنه والناس كلها طيبه
وانت طيب

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................