عم إبراهيــم منجعص على كرسى دكانه
زحل يسيب المجرة وهوه فى مكانـــــــه
انا قلت صبح يا عمى..قال صباح الخيــر
وضحكلى ضحكة بينتلى الباقى ف سنانه

سألته يا عمنا.إيه حكايـــة الإضـــــــراب
أصل اللى قاللى كده.الواد على النصــاب
قام قــاللى طيب بقى مهتم تعرف ليــــــه؟
دا شيئ ومن غير سبب.ولكل شيئ أسباب

الناس ومن غير سبب عاملين حاجات خايبة
فاكرين ويــــاللعــــجب إن البلد ســـايبــــــة
إيه يعنى تلاتـين سنة عايشــين كما الأموات
متعلقـين ف الهوى بخيوط حبـال دايبـــــــة

إيه يعنى يا ابنى الرغيف لو يبقى بالكارنيه
إيه يعنى كيلو الطماطم لو بخمســة جنيــــه
حد إشتكى والنبى أو قال ح اموت م الجوع
دا انا حتى باركب يا واد المترو بالأبونيــه

آل حد من خنقـتـه رمى نفسه م العــاشـــــر
علشان إزازة الزيـت وصلت تلاتــاشــــــر
وعنــده أربـع ولاد وبنــات دا غيـر امهــم
ومرتبه (كبير آوى) يـيجى مية وحداشـــر

(عم إبراهيم يظهر إنه كان( فاهم بصحيح
أستاذ ف فن البلاغة وف الخطابة فصيح
(قلت الحكومة (عسل) والشعب ده (ظالم
والشيخ(غلاء)برضه لازم يتبنيله ضريح

سـألـته آخر كــلامنـا.يعنى انـا مـــالـــى؟
أروح معـاهـم؟ والا أقـعـد هنا ف حـالى؟
قام قاللى ماآهى هيه هيه.طب حتفرق إيه؟
(من يشترى الغالى يا ابنى.(يدفع الغـالـى

بينـى وبينـكــم كلامـه ده ماريحنـيـــــش
انا رحتله لجل ما افهم ليــه ما فهمـنيـش؟
ورجعـت وانا بسـأل نفسى.ســؤال واحد
هوه النهارده بقى دورى ف طابورالعيش؟؟؟

وطبعا كل الكلام اللى فات ده على لسان (عم إبراهيم)أه والله العظيم
ياسعادة البيه...أنا عندى عيال وعايز أربيهم وأقليلهم بطاطس (بالزيت)وأجيبلهم

(عيش فينو)

وأعملهم(رز)و(مكرونة)وأشربهم(مية معدنية)و

(عم إبراهيم)

أناخلاص بطلت أحلق عنده والحلاق الجديد بتاعى لسه ما عرفتش ميوله..ولو طلع

زى عم إبراهيم(مش فاهم أى حاجة)و(بيدعى الفهم)حاغيره على طول...وهكذا لغاية ما ألاقى حلاق....................

( أعمى )